mércores 30/09/20
Política

O alcalde do Grove denuncia que o material de protección entregado pola Xunta "non se pode usar"

O alcalde do Grove, José Antonio Cacabelos, critica que a Xunta lles entregou menos material do anunciado e que recibiron máscaras de protección que "xa rompían nada máis abrilas". 
Máscara entregada pola Xunta ao concello do Grove (PSdeG Pontevedra).
Máscara entregada pola Xunta ao concello do Grove (PSdeG Pontevedra).

O alcalde do Grove, José Antonio Cacabelos, denunciou esta cuarta feira que o material que a Xunta da Galiza entregou aos concellos era "moita menos cantidade" da que previamente se lles prometeu e que, ademais, é de "moi mala calidade".

"Nin sequera o podemos utilizar", asegurou en declaracións a Europa Press o rexedor socialista, na liña do manifestado polo PSdeG de Pontevedra que, nun comunicado, asegura que o material de protección anunciado "aos catro ventos" pola Xunta consta de "máscaras rotas, caducadas e mesmo luvas non estériles ou de uso para barbería".

Cacabelos afirmou que, con esta protesta, non busca "xerar unha polémica política", mais censura a falla de "seriedade" coa que, di, actuou o Goberno galego. "Tanto o Goberno do Estado como a Xunta terá sempre en nós un aliado pero, por favor, hai que ser un pouco máis serios", indicou.

O rexedor relata que recibiu unha chamada da Xunta para avisarlle de que tiña que recoller o material sanitario que lle correspondía ao concello do Grove na delegación que o Goberno galego ten en Pontevedra. Entregáronlle unha única caixa na que dixeron que habería 80 máscaras e 144 pares de luvas.

"A primeira sorpresa foi que había mesmo menos material do que nos dixeron. Tan só viñan 68 máscaras", indicou o alcalde, que engadiu que "iso non foi o peor". "O material era de tan pésima calidade que o propio servizo de Emerxencias me dixo que iso non se podía repartir á xente porque era inútil. De feito, moitas xa rompían nada máis abrilas", aseverou.

Queixas a través da Fegamp

Así as cousas, varios concellos galegos trasladaron formalmente á Federación Galega de Municipios e Provincias (Fegamp) as súas queixas por situacións similares para que se lles faga chegar oficialmente á Xunta.

Por outra banda, o rexedor do Grove indicou que o que máis necesitan neste momento son máscaras, xa que, ademais da o servizo local de Emerxencias e á Policía Local, no concello grovense están a fornecer tamén de máscaras aos traballadores do 061, á Garda Civil e ás auxiliares de asistencia a domicilio.

O concello do Grove conta tamén con 170 equipamentos de traxes, patucos, e lentes, dos que se repartiron durante a campaña do Prestige. "Fixemos un chamamento aos veciños e asociacións para que aqueles que aínda os tivesen doásennolos e en dous días recibimos máis de 170", comentou.

O PP afea as críticas do PSdeG

O PP de Pontevedra saíu ao paso das críticas dos alcaldes do PSdeG, aos que afea que "aposten pola confrontación política ata nas peores circunstanicas".

Nun comunicado, o deputado durante a última lexislatura, Alberto Pazos, tachou de "lamentábel" que os socialistas "non esperasen nin un día para saír a queixarse, o que demostra que é o que pretenden".

"Critican á única Administración que está a colaborar cos concellos no envío de material sanitario. Que recibiron os concellos da subdelegación? Nada, e iso que a compra e a repartición de luvas, máscaras e outro material está centralizada no Goberno desde que decretou o estado de alarma", incidiu o popular.

comentarios