Albert Rivera non pasará por Galiza esta campaña electoral. O candidato de Ciudadanos á presidencia suspendeu a súa asistencia ao mitin que tiña programado na Coruña.
No seu lugar, Rivera asistirá ao funeral de Estado en Madrid polos dous policías falecidos no atentado contra a embaixada española en Kabul.
A portavoz de Ciudadanos no Parlamento catalán, Inés Arrimadas, substituirá ao número 1 da formación laranxa no mitin que celebrará no Palacio da Ópera na Coruña.
Ciudadanos optou por unha campaña de perfil baixo en Galiza, con repartos de propaganda a pé de rúa e sen actos políticos. Tampouco aceptaron participar dos debates electorais. Agora, no único mitin de envergadura na axenda tampouco contará co seu líder.
