Alternativa Galega de Esquerdas avogou no debate parlamentar por uns orzamentos “menos lesivos para as maiorías sociais”, en palabras da vice-portavoz Yolanda Díaz, propondo un incremento no teito de gasto non financeiro de 250 millóns de euros –amparado na flexibilidade legal- e máis unha relación de medidas fiscais para recadalos, “o que suporía unha importante suavización nos recortes e nos gastos non financeiros en sanidade, educación, servizos sociais e emprego”.
Entre as medidas fiscais defendidas pola emenda de AGE está, entre outras, un incremento impositivo nos tramos máis altos da tarifa autonómica do IRPF; o mantemento do imposto de patrimonio con carácter permanente; un imposto sobre as grandes superficies comerciais ou sobre os pisos baleiros; ou un plan de loita contra a fraude fiscal.
Yolanda Díaz, denunciou no debate a “estratexia económica” do Partido Popular que resume “nun transvase das rendas salariais e do traballo á rendas do capital para engordar aínda máis os ricos”. Como exemplo deste proceder, Díaz dixo: “Vostedes baixan un imposto directo, o IRPF, e soben un imposto indirecto regresivo, como é o denominado céntimo sanitario, polo que ademais a Xunta pode ser condenada por Europa”.
