Adolfo Muíños Sánchez, Alcalde de Rianxo

Adolfo Muíños, alcalde de Rianxo: "A obra de Castelao ten unha vixencia plena"

No 73 aniversario do pasamento de Afonso Daniel Rodríguez Castelao, Nós Diario conversa co que foi, durante os últimos 12 anos, alcalde da vila natal do que é considerado pai do nacionalismo galego. Adolfo Muíños Sánchez fai balance do seu mandato á fronte do Bloque Nacionalista Galego (BNG) de Rianxo.
O nacionalista non repetirá como candidato á alcaldía. (Foto: Arxina)
photo_camera O nacionalista non repetirá como candidato á alcaldía. (Foto: Arxina)

—Como celebra Rianxo este 73 aniversario do pasamento de Castelao?
É xa unha tradición que o BNG celebre a apertura do ano político en Rianxo, un acto que se suma á ofrenda que o BNG de Rianxo realiza sempre a Castelao. Trátase dun acto o máis solemne posíbel no que mantemos a vixencia do seu pensamento político, á vez que lembramos as profundas raíces rianxeiras que tiñan Castelao e a súa familia.

—Unha figura como Castelao, debería celebrarse máis dun día?
Eu creo que Castelao hai para os 365 días do ano. Precisamente, desde o Goberno municipal inténtase que así sexa e que todos os días se poida celebrar e lembrar Castelao. O  Concello abriu un itinerario que vincula máis de 33 lugares que fan referencia á súa traxectoria vital, literaria e política en Rianxo. Esta ruta pódese facer en calquera momento do ano e inclúe desde episodios da súa infancia, da súa escrita literaria, as súas amizades, o entorno no que viviu, até onde desenvolveu a súa praxe política e xornalística n'O Barbeiro Municipal. Desde Rianxo podemos interpretar boa parte da traxectoria de Castelao, que nunca deixou de ter a vila como referente na súa actuación. 

—Queda traballo por facer en canto a honrar a súa memoria?
A musealización da casa de Castelao é a materia pendente, non para o Goberno municipal, senón para a Presidencia do país. A figura de Castelao pide que haxa vontade desde a Presidencia da nosa nación para embarcarse no rescate da súa vivenda, e que sexa patrimonio público. É unha tarefa  pendente da nosa nación que un dos seus fillos máis senlleiros sexa tratado como merece.

—Que pensaría Castelao ante a situación política actual?
Non querería nin preguntarlle! Parece mentira que a situación política sexa así. Non quero nin pensar o que diría se soubese que se lexisla en contra do propio idioma. Durante un período no que debería haber un amor pola lingua que evitase a súa degradación, comprobamos como por primeira vez na historia o número de castelanfalantes supera o de galegofalantes. Isto prodúcese cun Goberno autonómico que está compracido nesa situación.

Poderiamos falar de acreditar nun país que non é pobre. Aquela mensaxe que el axudou a deseñar cando falamos do primeiro estatuto da Galiza, aqueles carteis que facían referencia aos tetos da vaca, que uns moxen para que outros leven o leite. Hoxe estamos ante unha situación igual: cambia os tetos da vaca por muíños eólicos e a enerxía que producimos, para que outros acaben levando os beneficios. 

Castelao fixo unha obra, tanto literaria como política nese Sempre en Galiza, que ten unha vixencia plena, sempre interpretando a luz dos tempos, pero con mensaxes que seguen a ser tremendamente poderosas. 

—Esta é a última homenaxe a Castelao como alcalde da súa vila natal. Que balance fai destes últimos 12 anos?
No que atinxe a Castelao son 12 anos nos que intentamos ser fieis ao seu pensamento e defender con unllas e dentes o noso patrimonio, a nosa lingua e a nosa cultura. Coido que, nese sentido, acudimos a esa chamada a ser consecuentes co noso pensamento e co de Castelao.

Responsabilizámonos de cuestións relacionadas co noso dereito a producir, con loitas como a do xeito ou contra a lei de acuicultura. Tamén buscamos o maior apoio social e facer un Goberno para todas e todos. 

Isto é o que pretendemos ao longo deste anos, sen perder a decencia nin a responsabilidade.

Tarefas pendentes para o BNG de Rianxo

Adolfo Muíños considera que as tarefas ás que se enfrontará o BNG rianxeiro teñen que ver co reforzo social. O alcalde agarda que haxa "colaboración institucional" para que unha adquisición tan "importante" para a veciñanza como foi a do Pazo de Rianxiño acabe sendo un centro de día público. "Fíxose un esforzo enorme para pór o pazo nas mans da institución competente, a Xunta da Galiza, para crear ese centro de día", sinalou Muíños. A este centro de día o alcalde agarda que se poida sumar unha residencia pública, pois o Concello e a Deputación da Coruña atópanse en diálogo para a cesión dun espazo. 

Muíños destacou tamén os fondos conseguidos (un millón de euros) para rehabilitar un Ben de Interese Cultural como é o Pazo de Martelo, a sede da biblioteca municipal rianxeira, unha reforma que o alcalde agarda se faga realidade.

A INFORMACIÓN GALEGA ESTÁ NA TÚA MAN!

Subscríbete ao noso boletín de novas.

Date de alta de balde e recibirás unha selección dos nosos artigos para saberes o que acontece.

comentarios