A axenda das distintas formacións políticas galegas para este 25 de xullo adáptase aos protocolos de protección sanitaria reducindo o número de eventos e aplicando o distanciamento social nas súas manifestacións, ademais de lembrarlle á militancia o obrigado uso das máscaras.
A capital galega acollerá os actos organizados pola organización independentista Causa Galiza e polo Bloque Nacionalista Galego, que conmemora este ano o centenario do Día da Patria Galega. Na Coruña e Rianxo terán lugar as ofrendas florais organizadas por Anova-Irmandade Nacionalista e o PSdeG, respectivamente. E desde o Partido Popular non se lle puido confirmar a este diario a realización de ningún evento especial para o 25 de xullo.
Día da Patria expansivo e telemático para o BNG
A formación nacionalista realizará a súa tradicional manifestación desde a Alameda compostelá ás 12 horas, pero desta volta a concorrencia de militancia e simpatizantes estará limitada a un milleiro de persoas, as mesmas que poderán presenciar o posterior discurso da líder Ana Pontón na praza da Quintana. Pero Compostela non será a única cidade de celebración do Bloque, senón que terán lugar actos simultáneos na Coruña, Ferrol, Pontevedra, Vigo, Lugo e Ourense, e realizarase unha conexión telemática prevista para as 12.45 horas. Cómpre destacar que entre as comarcas convocadas á celebración de cada un destes actos queda excluída, por mor da situación sanitaria pola Covid-19, a Mariña.
A mocidade de Galiza Nova realizará unha ofrenda floral a Rosalía de Castro e a Alfonso Daniel R. Castelao, que terá lugar no parque de Bonaval ás 18 horas do día 24 de xullo. A Covid-19 impide este ano que decorra o Festigal.
Os socialistas galegos réndenlle homenaxe a Castelao
Un ano máis, o Partido Socialista da Galiza achégase á vila de Rianxo para celebrar o Día da Patria realizando unha ofrenda floral ante o busto do político galeguista Alfonso Daniel R. Castelao. No evento intervirá Gonzalo Caballero, secretario xeral da formación, acompañado dalgúns dos seus deputados electos e de membros da executiva do PSdeG.
Ofrenda floral de Anova aos fusilados da República
O monumento deseñado por Isaac Díaz Pardo no Campo da Rata da Coruña acollerá ás 12 horas do 25 de xullo a homenaxe floral de Anova aos galegos e ás galegas republicanas fusiladas, nun acto no que intervirá o portavol nacional, Antón Sánchez. Baixo o lema "Adiante República Galega", Anova quere recoñecer "os republicanos e republicanas que deron a súa vida pola liberdade e a xustiza social".
Por mor da actual situación sanitaria, Anova viuse na obriga de cancelar o xantar que, nos anos anteriores, realizara como remate dos seus festexos do 25 de xullo.
Cadea humana de Ceivar e manifestación desde Causa Galiza
A organización independentista Ceivar convoca, para o 24 de xullo, a XIII Cadea Humana pola Liberdade dos Presos e Presas Independentistas. A xuntanza, que terá lugar na praza de Galiza de Compostela ás 19 horas, percorrerá a cidade até a praza do Pan para esixir a liberación dos presos Roberto Fialhega 'Teto', Antom Garcia, Eduardo Vigo e Miguel Garcia e da presa Asunción Losada. Neste último caso, Ceivar denuncia a aplicación "de réximes de dispersión" a esta galega presa no cárcere madrileño de Estremera.
Ás 12.30 horas do día 25, Causa Galiza manifestarase, aplicando tamén medidas de seguridade, desde a Alameda compostelá baixo o lema "Mais independentismo para fazer frente à crise".
Mocidade pola Independencia
"Combatemos a precariedade construíndo Galiza" é o lema de Mocidade pola Independencia para o Día da patria deste ano. Convocan unha manifestación ás 20:30 horas desta sexta feira, 24, con saída das Alameda de Compostela e a partir das 23:30, e desde a Praza de Cervantes, haberá unharondalla.
DE por parte, Agora Galiza.-Unidade Popular ten unha concentración-acto político o 25 de xullo na Praza 8 de marzo de Compostela baixo o lema: Paremos o fascismo: independencia e socialismo".