1,2 millóns de euros saíron da Galiza á caixa B do PP

Seguindo os denominados "papeis de Bárcenas", o PP galego foi o principal sustento da caixa B do partido a nivel estatal. As anotacións do ex tesoureiro mostran que entre 1990 e 2008 o PP manexou até 8,3 millóns de euros de cartos en negro, dos cales, cando menos, 1,2 millóns de euros (203 millóns de pesetas) procederían da Galiza. Ángel Piñeiro e Pablo Crespo, ex dirixentes do PPdeG, aparecen nos papeis achegando ingresos millonarios en negro. Precisamente esta quinta feira, 25 de marzo, estaba previsto que testemuñase na Audiencia Nacional Pablo Crespo, secretario de organización do PPdeG de 1995 a 2003. A súa declaración íase producir desde a cadea, xa que actualmente cumpre condena como número dous da trama Gürtel. Mis finalmente, o xuíz anunciou que a acusación desistía do seu testemuño, convocando as partes para continuar o xuízo após a Semana Santa. Crespo asegurou que repartía os sobres na Galiza co coñecemento do partido A inesperada non comparecencia de Pablo Crespo supuxo enorme alivio sobre as costas dos populares galegos e o círculo de Raxoi, xa que o preso amosara recentemente a súa disposición a colaborar coa xustiza, como demostra o facto de que solicitara a repatriación de fondos agochados en Suíza para facer fronte ás multas pendentes coa xustiza. Xa en 2018, nunha comparecencia no Congreso, chegou a afirmar que no PPdeG existía unha dinámica de pagos en B "instalada institucionalmente” e “había doazóns irregulares [...] de empresarios, e efectivamente había unha contabilidade que non estaba na contabilidade do partido”. Crespo xa recoñeceu con anterioridade a súa participación en pagos en negro a dirixentes populares galegos e avisou de que gardaba probas. Dos 14 primeiros ingresos na caixa B, 13 procederían da Galiza Nesa comparecencia de 2018 Crespo asegurou que el mesmo, en nome do partido, repartiu diñeiro negro entre cargos do PP e xornalistas. No caso dos cartos entregados a cargos políticos o obxectivo sería compensar a diferenza salarial respecto ao que gañaban antes de acceder ao posto público. Estes cartos procedían, dixo Crespo, de doazóns de empresas que tamén se destinarían a financiar campañas electorais até nun 75% dos custos. Galiza, eixo inicial da Caixa B Deixando de lado o gran financiamento en negro de campañas electorais sinalado por Crespo, e atendendo só aos papeis de Bárcenas, a achega galega á contabilidade B do PP sería de 1,2 millóns de euros. Os apuntamentos entregados por Bárcenas á Audiencia Nacional arrancan en 1990, cando ocupa a xerencia do PP estatal á sombra do daquela tesoureiro, Álvaro Lapuerta, xa falecido. Neses papeis da contabilidade paralela do partido figura como primeiro depositante "Pepe C." a quen Bárcenas engadiu "Gal", polo que varias fontes apuntan a que se podería tratar do ex secretario xeral do PPdeG, Pepe Cuíña, falecido en 2007. Este "Pepe C." tería inaugurado a Caixa B achegando en negro 10 millóns de pesetas. O segundo depositario que figura nos papeis é "Piñeiro" (sinalado como Ángel Piñeiro, ex xerente do PPdeG e íntimo de Mariano Raxoi), cunha entrega en novembro de 1990 de 5 millóns de pesetas, ao que seguiron seis ingresos máis en 1991 por un total de 39,5 millóns e cinco ingresos en 1992 por valor global de 67 millóns. Os papeis de bárcenas comezan e rematan con cartos da Galiza En total, entre os 14 primeiros ingresos rexistrados (1990-1992), 13 terían orixe Galiza: o de "Pepe C." e os 12 efectuados por "Piñeiro". En 1993, as únicas tres achegas rexistradas son tamén de "Piñeiro", e alcanzan en total 32 millóns de pesetas, sendo así, até entón e en tan só catro anos, o principal recadador do partido, achegando 97,2 millóns de pesetas (583.000 euros) en todo ese período. En 1994, Piñeiro entrega 15 millóns de pesetas. Logo, en 1995, Bárcenas anota a nome de "Ángel P." (co que se continuaría a referir a Ángel Piñeiro) un ingreso de 15 millóns de pesetas en febreiro; outro de cinco en abril; un de oito en maio; outro de catro en xuño e outro de cinco en novembro. Tamén nese ano aparece un novo ingreso, de 4 millóns, mais desta vez o seu nome figura completo: "Entrega de Ángel Piñeiro". En 1995 Piñeiro é o único depositante na caixa B, ademais dos 4 millóns que entrega "PAC", siglas que coinciden co ex secretario xeral do PP Paco (Francisco) Álvarez Cascos. En 1996 Bárcenas non anota nos seus papeis ingresos procedentes da Galiza. Precisamente é cando Piñeiro deixa Galiza e acompaña Raxoi a Madrid cando José María Aznar chega á Presidencia de España. Despois, en 1997 as anotacións de Bárcenas recollen novamente entregas, agora baixo a denominación "Galicia", ao que imputa dúas achegas, unha de 5 millóns e outra de 1,992 millóns de pesetas. A "Galicia (O.C.)" anótalle tres entregas de tres millóns cada unha nese ano, e outras dúas coa mesma cantidade en 1998. Bárcenas afirmou que esta denominación fai referencia a unha construtora que destinaba fondos ao PP na Galiza. As anotacións do ano 1999 revelan outra entrega procedente da Galiza, a realizada por Pablo Crespo, de até 21 millóns das antigas pesetas. Piñeiro, o amigo de pupitre de Raxoi "Coñece Angel Piñeiro?", preguntou esta semana a acusación no xuízo da Caixa B na Audiencia Nacional ao ex presidente Mariano Raxoi. "Coñézoo. Ao mellor foi xerente do partido, non tiña cargo, traballaba comigo...", sinalou Raxoi, visibelmente nervioso e incomodado pola pregunta. "Pois Bárcenas dixo que era home de confianza seu" e que "desde Galiza [Piñeiro] traía esas cantidades", uns 100 millóns de pesetas, a Xénova e que logo "se transferían", explicou a acusación a Raxoi, que volveu asegurar que non sabía nada. Ángel Piñeiro pasou desapercibido na súa carreira política, mais é peza chave nos papeis de Bárcenas, no PP galego e no pontevedrés. É amigo da infanza de Mariano Raxoi, desde que foron compañeiros de pupitre. Piñeiro foi o seu home de confianza desde moito antes de que Raxoi fose presidente do Estado, xa cando ocupaba cargos de responsabilidade no PP de Pontevedra, na Deputación pontevedresa e na Xunta. Piñeiro foi xerente do PPdeG a principios dos noventa e cando Aznar nomea ministro Raxoi, este lévao consigo até 2004, cando o PSOE chega ao Goberno estatal. Entón Piñeiro volta a Galiza onde, logo de realizar traballos para o PP, volveu retomar a súa profesión de mestre. Galiza, na cerna do baleirado da Caixa B E como dun círculo perfecto se tratar, ao igual que os populares galegos están no inicio das anotacións de Bárcenas da caixa B tamén están no seu baleirado. Segundo detallou o ex tesoureiro na Audiencia Nacional, cando marchaba do despacho, en 2010, quixo baleirar a caixa, entregando un sobre con 25.000 euros a Raxoi e outro coa mesma cantidade á daquela secretaria xeral do PP, Dolores De Cospedal, con cartos, segundo dixo, procedentes dunha entrega en negro en Xénova de 180.000 euros procedentes do PP de Pontevedra. Naquela altura Núñez Feixoo xa era presidente do PPdeG e da Xunta.