O Ministerio de Asuntos Exteriores de Lituania fixo público un comunicado esta segunda feira como resposta "ás interpretacións da imprensa española" en relación ás declaracións do primeiro ministro a respeito do proceso de independencia de Catalunya.
O executivo lituano amosa "a súa preocupación" pola leitura "tendenciosa" e "errónea" que se fixeron das afirmacións deitadas por Algirdas Butkevicius onde aseguraba que recoñecía o "dereito de autodeterminación dos pobos" e, neste senso, cada país debe atopar o seu camiño cara á independencia, de igual maneira que Lituania o fixera.
Porén --aclarar desde a embaixada-- o primeiro ministro on quixo comparar nas súas declaracións a "ocupación soviética" coa situación que está a viver Catalunya co Estado español ao se tratar este último, din, dun "país democrático, membro da UE" e, destacan, "socio próximo" na NATO. Así, o goberno lituano recúa e cualifica o proceso soberanista catalán como un "asunto doméstico de España" que há de resolverse por vías "legais e democráticas" garantindo o respecto á Constitución.
O gabinete de comunicación fai seus os argumentos empregados polo goberno español e dobrégase ás presións exercidas desde o departamento de relacións internacionais do executivo de Mariano Rajoy --que amosou o seu malestar polos pronunciamentos dos xefes de goberno lituano e letón.
Segundo apuntan diversos medios de comunicación, a embaixada de Letonia tamén está a preparar unh comunicado público para desdicir as declaracións do seu primeiro ministro en aras de se amosaren partidarios do mantemento de Catalunya no Estado.
![[Imaxe JxS] Muriel Casals](/asset/zoomcrop,480,270,center,center/media/nosdiario/images/2016/02/14/2016021411384555262.jpg)
