A Audiencia Provincial de Barcelona comunicou nesta terza ao sindicato CGT que porá en liberdade baixo fianza de 6.000 euros a Laura Gómez, secretaria de organización desta central na cidade condal que cumpría prisión preventiva imputada pola comisión de actos violentos cometidos durante a folga xeral do 29M que sumaban até 20 anos de cárcere.
O día 29 pola mañá Laura Gómez participou nunha acción fronte á Bolsa de Barcelona. Tal e como estaba acordado pola organización, @s manifestantes queimaron de forma controlada unha caixa de cartón con papeis dentro, unha performance que simbolizaba a queima de diñeiro. No marco desta acción, sen que estivese previsto, tamén se produciu a rotura dos cristais da porta da Bolsa de Barcelona.
Segundo confirmou a secretaría de prensa deste sindicato en Barcelona, a organización recadou máis de 20.000 euros na campaña de solidariedade con Laura Gómez. As compañeiras e compañeiros da sindicalista coñeceron a noticia cando se concentraban fronte á Audiencia Provincial de Barcelona, onde pedían a súa posta en liberdade. Despois dirixíronse ás portas do Parlament de Cataluña, onde estaba prevista a comparecencia do conseller de Interior, Felip Puig, para explicar o dispositivo policial empregado na represión da folga do 29 de marzo en contra da reforma laboral. Segundo informa CGT, "nun acto de covardía" Puig decidiu atrasar a súa comparecencia alegando a súa asistencia aos traballos de extinción dun incendio en Barcelona.
Sobre Gómez pesaban cargos de incendio, danos, coaccións, desordes públicas e delito contra os dereitos fundamentais, acusacións polas que o xulgado de instrución número 23 de Barcelona decretou a súa prisión preventiva o 25 de abril. A sindicalista non foi identificada nin detida por acto algún durante o 29M e a súa detención produciuse no seu lugar de traballo. Segundo os colectivos en apoio á sindicalista, o encarceramento de Gómez obedeceu a presións políticas sobre a fiscalía e o xulgado, dado que a acusada non tiña antecedentes, dispón de traballo fixo e é nai dunha menor, motivos polos que non cabía esperar o risco de fuga.