Histórica maioría absoluta do bloco independentista en Catalunya

[ACTUALIZADA ÁS 00.33]. A República de Catalunya está máis perto. O bloco independentista (a suma Junts pel Sí e a CUP) obtivo este 27 de setembro, e folgadamente, a maioría absoluta de escanos no Parlament, ao conseguir 72 asentos (62 e 10, respectivamente). Ciutadans fíxose coa segunda praza, con 25 escanos. Os grandes derrotados foron o PP e Catalunya si que es Pot (a suma de Podemos e Iniciativa per Catalunya).

Junts pel Sí. Eleccions catalás — Foto: NacióDigital

H.V.

28/set./15 - 00:40 Actualizado: 28/set./15 - 19:03

Seguinte

Por vez primeira o nacionalismo maioritario (o que representou CiU) comparecía nunhas eleccións ao Parlament catalán cun discurso e unha proposta inequivocamente independentista. Facíao en coligazón con ERC e coas entidades soberanistas, a ANC e Ómnium Cultural. O resultado de Junts pel Sí superou todas as espectativas, ao conseguir por si soa 62 escanos, só 6 por debaixo do limiar da maioría absoluta.

Mais os resultados converten a Candidatura d'Unitat Popular (CUP) no novo actor chave da política catalá. Non só completa a maioría absoluta independentista coas súas 10 actas (7 máis das obtidas en 2012), senón que ten virtualmente a chave da presidencia da Generalitat nas súas mans. Será a CUP quen decida que candidato de Junts pel Sí pode obter a maioría de votos para ser investido.

O cadro complétase co definitivo ascenso de Ciutadans como a forza hexemónica do unionismo en Catalunya e coa relativa sorpresa dun PSC que mantén unha capacidade de resistencia máis que notábel e que, contra todo prognóstico, frea no flanco da esquerda estatal a Podemos. A formación de Pablo Iglesias é, co PP, a grande derrotada das eleccións. A súa marca en Catalunya -unha coligazón con Iniciativa per Catalunya- só obtivo 11 escanos, 2 menos dos conseguidos por ICV en 2012.