Liberais, social-cristiáns e social-demócratas cataláns confluirán nunha nova organización política após os comicios do 20 de decembro ás Cortes españolas. Así o anunciou o presidente de Convergència, Artur Mas, nun acto da candidatura Democràcia i Llibertat, a coligazón na que concorren xunto con Reagrupament, ás eleccións.
O xurdimento desta nova formación política que "se materializará en 2016", segundo avanzou o propio Mas, responde ás necesidades de "este país novo", en referencia a unha Catalunya independente mais que tamén suporá a refundación de CDC após a ruptura cos que foran seus socios electorais durante máis de 30 anos, Unió Democràtica de Catalunya.
O proxecto político que deseñan CDC e Reagrupament visa converterse nunha "grande corrente central" da política catalá no marco dunha Catalunya independente. Unha "ferramenta nova" que aproveite o "mellor" do que se ten feito "deixe á marxe o que non serve".
![[Imaxe JxS] Muriel Casals](/asset/zoomcrop,480,270,center,center/media/nosdiario/images/2016/02/14/2016021411384555262.jpg)
