O Tribunal Supremo británico aproba a extradición de Assange

O tribunal supremo británico aprobou a extradición do fundador de Wikileaks, Julian Assange, a Suecia, onde é acusado por supostos delitos de agresión sexual.
Assange
photo_camera Assange

Assange, de orixe australiana, estaba ausente da sala cando foi comunicada a decisión nunha audiencia que durou 10 minutos. Cinco dos sete xuíces do Supremo consideraron que no caso dunha petición de detención para toda a Unión Europea (UE) abondaba coa firma dun fiscal. No entanto, a aplicación da decisión ficou pendente para dentro de dúas semanas xa que o tribunal outorgou á defensa ese prazo para pedir a reapertura do proceso.

O xornalista, de 40 anos, converteuse nunha celebridade mundial e enfureceu o Goberno de Washington en 2010 cando Wikileaks deu a coñecer filmacións secretas e miles de telegramas diplomáticos estadounidenses sobre as guerras en Iraq e Afganistán.

Assange acusa as autoridades de Estados Unidos de estar detrás do proceso legal

Assange, retido en Londres desde decembro de 2010, oponse ao seu envío a Suecia, xa que ademais de defender insistentemente a súa inocencia, acusa as autoridades de Estados Unidos de estar detrás do proceso legal.

A súa detención respondía a unha orde europea emitida pola fiscalía da nación escandinava para interrogalo como sospeitoso de catro supostos delitos de agresión sexual, polos cales aínda non foi formalmente acusado.

O fundador de Wikileaks recorreu ao Supremo despois de que en novembro de 2011 o Tribunal Superior aprobase a súa extradición a Suecia, confirmando así a decisión tomada en febreiro dese mesmo ano por unha corte inferior.

A INFORMACIÓN GALEGA ESTÁ NA TÚA MAN!

Subscríbete ao noso boletín de novas.

Date de alta de balde e recibirás unha selección dos nosos artigos para saberes o que acontece.

comentarios