Os Irmáns Musulmáns, espidos de poder polos militares, gañan as presidenciais en Exipto

Os axustes introducidos pola Xunta Militar na Declaración Constitucional pola que se rexe o país de maneira transitoria permiten que os militares redacten a Constitución, controlen a carteira de Defensa e xulguen civís en tribunais castrenses
photo_camera Imaxe da Praza Tahrir despois de coñecer os resultados das eleccións

A comisión electoral exipcia confirmou este domingo a vitoria de Mohammed Mursi, o candidato dos Irmáns Musulmáns, nas eleccións presidenciais en Exipto que tiveron lugar hai unha semana. Este islamista educado nos Estados Unidos prometeu defender o espíritu da revolución. Mais a súa vitoria non despexa as dúbidas ao redor do poder real que terá o novo mandatario, o primeiro escollido nunhas eleccións libres e que chega ao Goberno 16 meses despois do derrocamento de Hosni Mubarak.

Así as cousas, o Exército agardou o peche das urnas para facer pública a súa folla de ruta, que lle permitirá controlar o país tras a derrota do ex primeiro ministro Ahmed Shafiq, que era a aposta dos militares. Ao ver como lles escorregaba das mans o bastón de mando coa máis que probábel vitoria islamista, que agora se confirmou, o xeneral Mamduh Shanin, membro do Consello Superior das Forzas Armadas, anunciou uns 'pequenos' axustes na Declaracións Constitucional transitoria, en virtude dos cales serán os militares os que ostenten o poder lexislativo até a formación dun novo Parlamento, os que redacten a Constitución --podendo limitar as competencias do novo presidente e o poder do propio Parlamento-- e os que controlen o orzamento e a carteira de Defensa.

A Xunta Militar mantén, deste xeito, baixo o seu control os seus dous principais intereses: a política exterior --as relacións con Israel e as estratexias xeopolíticas-- e blindar a súa actuación en materia de seguridade. E é que á vez que asumían o control lexislativo, os militares volvían outorgarse poderes correspondentes ao estado de excepción. O ministro de Xustiza, Adel Abdelhamid, outorgou á policía militar e oficiais de investigación o poder de deter a civís, unha capacidade que fora eliminada cando a finais de maio expirou o estado de emerxencia, e que entrou en vigor de novo esta quinta.

Segundo a xunta militar, esta medida terá vixencia durante a elaboración da nova Constitución, un proceso que debería durar aínda meses, aínda que podería alargarse aínda máis se a disolución do Parlamento esténdese tamén ao comité que creou para elaborar a Carta Magna. A medida permitirá ás Forzas Armadas arrestar a civís --até o de agora só podía facelo a policía-- e procesalos en tribunais castrenses.

Varias organizacións defensoras de dereitos humanos advertiron de que convertería a Exipto nun estado militar con restricións peores aínda que as do estado de emerxencia. "Varios crimes contemplados no decreto son realmente dereitos, como a liberdade de expresión contra as autoridades ou as leis actuais, acudir a manifestacións ou facer folga", denunciaron 17 organizacións non gobernamentais locais. Co escenario que van crear, aínda cando os militares devolvan o poder lexislativo ao presidente --de momento terá só competencias executivas-- Exipto terá, na sombra, un Goberno castrense.

Máis en Mundo
Comentarios