venres 24/09/21
ENTRE 16 E 50 FALECIDAS

Sobe o número de persoas mortas polo bombardeo dos EUA contra un hospital afgán xestionado por MSF

[ACTUALIZADA ás 17.51] Aumentan as cifras de persoas falecidas no bombardeo do Exército estadounidense na madrugada do sábado contra un hospital da cidade afgá de Kunduz. Mentres que pola mañá se falaba de 9 persoas mortas e 37 desaparecidas, as cifras de falecidas oscilan agora entre as 16 e as 50 persoas, a falta de que se confirmen os datos.

[Imaxe: MSF]
MSF

Fontes do Goberno afgán informan esta mañá de que cando menos nove sanitarios de Médicos Sen Fronteiras foran asasinados esta noite consecuencia dun ataque dos EUA a un hospital da cidade de Kunduz e de que unhas 37 persoas que pertencen a esta ONG estarían feridas. A estas horas a cifras de mortos e mortas oscilarían entre as 20 e as 50. Segundo The Guardian, as persoas falecidas serían 20. O Telegraph, pola súa parte, aumenta o número de persoas mortas a medio cento. Medios españois aseguran que os mortos son, cando menos, 16, a mesma cifra que achega MSF.

“Como resultado do bombardeo estadounidense contra o hospital de MSF en Kunduz, cando menos tres persoas morreron e 37 resultaron feridas, incluídos persoal de MSF”, apuntaba na súa conta de Twitter Wahidullah Mayar, portavoz do Ministerio de Saúde de Afganistán, esta mañá antes de coñecerse que os falecidos ascendían a entre 20 e 50 persoas.

A OTAN, que investiga o bombardeo e a súa procedencia, sinalou que o ataque tivo lugar contra “persoas que ameazaban as forzas da coalición”, sen precisar máis nada. A Alianza Atlántica mantén ao redor de 4.000 militares en territorio afgán “en misión de asistencia” e os EUA manteñen unha operación “antiterrorista” na que participan perto de 10.000 efectivos.

No momento do bombardeo no centro hospitalario atopábanse 105 doentes e uns 80 sanitarios.

Kabul e Washington estaban "claramente informadas" da localización precisa do hospital

MSF vén de emitir un comunicado no que, amais de condenar o ataque, asegura que informou "todos" da posición do hospital de Kunduz. "MSF desexa aclarar que todas as partes en conflito, incluíndo Kabul e Washington, estaban claramente informadas da localización precisa (as coordenadas GPS) de todas as instalacións de MSF", salienta na nota de prensa.

A ONG tamén sinala que o ataque dos bombardeiros "continuou durante máis de 30 minutos" logo de que "as autoridades militares de Kabul e Washington foran informadas por vez primeira". MSF pide que se dea a coñecer de maneira urxente o que aconteceu con exactitude e que se explique "como puido pasar un feito tan terríbel".

A ONU, pola súa banda, denunciou o carácter "posibelmente criminal" do bombardeo do hospital de MSF en Kunduz.

comentarios