A Xustiza decide que os bens do Pazo de Meirás reclamados polo Estado fiquen baixo control da Administración

O Xulgado de Primeira Instancia número 70 de Madrid acordou que os bens que permanecían no Pazo de Meirás (Sada) e que o Estado reclama permanezan de momento alí en depósito até que o preito que mantén a Administración coa familia Franco finalice.

Resolve así favorabelmente a medida cautelar solicitada pola Administración Xeral do Estado e o Consello de Administración do Patrimonio Nacional, e decreta que os bens identificados na demanda, incluídos os que pertenceron á escritora Emilia Pardo Bazán queden en depósito baixo a custodia do Estado.

A Avogacía do Estado reclamaba un total de 564 bens móbeis localizados no pazo, entre os cales incluía elementos que o Goberno español considera que son Patrimonio Nacional (2), Patrimonio Documental (409) e de dominio público (153) “polo seu interese histórico ou artístico”.

O letrado dos Franco sostiña que non había perigo de deterioración ou desaparición deses bens e destacara que os servizos xurídicos non foran precisos á hora de inventarialos.

Os Franco querían mover os bens

A defensa da familia do ditador Francisco Franco negábase a que eses bens permanecen no pazo baixo a tutela do Estado ao entender que non había perigo de que se producisen desmáns sobre os mesmos.

A esta demanda da Avogacía do Estado sumáranse no mes de outubro a Xunta da Galiza e tamén se sumara o Concello de Sada.