domingo 25/07/21

Os xardíns de Meirás abren ao público este sábado

O acceso ao interior do pazo segue sen estar permitido. 
O Pazo de Meirás, no día da súa devolución ao dominio público (Foto: M. Dylan / Europa Press).
O Pazo de Meirás, no día da súa devolución ao dominio público (Foto: M. Dylan / Europa Press).

Os xardíns do Pazo de Meirás reabrirán a partir deste sábado, xornada na que un acto institucional coa vicepresidenta primeira, Carmen Calvo, á cabeza escenificará a recuperación do complexo logo do proceso xudicial contra os herdeiros do ditador Francisco Franco.

No acto, que empezará a partir das 10 horas, o número dous do Executivo estatal estará acompañada polo secretario de Estado de Memoria Histórica, Fernando Martínez, e tamén se prevé a participación do conselleiro de Cultura, Román Rodríguez, entre outras personalidades.

Á reapertura dos xardíns do Pazo de Meirás, chégase após a sentenza ditada polo Xulgado de Primeira Instancia número 1 da Coruña que condenou os Franco á devolución do inmóbel despois de estimar integramente a demanda interposta polo Estado.

Trátase dunha posesión provisional, á espera dunha sentenza definitiva, após o recurso presentado polos Franco ante o Tribunal Supremo e nun proceso xudicial no que tamén está aínda por determinar que pasará cos bens do inmóbel.

E é que, a diferenza da sentenza ditada pola xuíza nese primeiro fallo, a Sección Terceira da Audiencia Provincial da Coruña revogou o depósito mobiliario a favor do Estado, aínda que deixou aberta a posibilidade de que o Goberno español poida reclamar noutro preito a titularidade dos de Patrimonio Nacional.

Os xardíns do Pazo de Meirás poderán volver de novo a visitarse após as obras acometidas polo Estado, que tamén está a executar arranxos no interior do pazo, ao que, polo momento, non se poderá acceder.

As visitas retomaranse despois de que o pasado 30 de xaneiro pospuxésense polo contexto sanitario e as restricións existentes e após o acordo alcanzado recentemente entre as distintas administracións implicadas: Goberno estatal, Xunta, Deputación coruñesa e concellos da Coruña e Sada, encargado este último da xestión das mesmas.

Memoria

Máis de mil persoas acompañaron o movemento memorialista galego na manifestación en Meirás o sábado 19 de xuño, que topou coas portas do Pazo fechadas por orde do Goberno do Estado "que impediu unha xornada festiva nos xardíns das Torres, un espazo recuperado co esforzo de ducias de activistas durante máis de 40 anos", segundo sinalou nun comunicado a plataforma Defende Meirás.

"Desde a última marcha a Meirás mudou algo moi significativo. O Pazo agora é patrimonio do Estado. O que non mudou é o lado do muro no que temos que manifestarnos. Seguimos sen poder entrar no Pazo de Meirás. O Estado español non o permitiu. Nunha democracia normal, hoxe as portas de Meirás estarían abertas. Mais están pechadas", sinalaba Carlos Babío, portavoz da plataforma que conta co apoio de 68 organizacións memorialistas de todo o país, partidos, sindicatos, asociacións veciñais e culturais.

comentarios