Após unha iniciativa presentada conxuntamente polos grupos municipais do BNG, PSdeG e C's de Ribeira na que exixen á corporación local --en mans do PP-- que dea cumprimento á Lei de Memoria Histórica, o alcalde ribeirense, Manolo Ruíz, iniciou un cruce de acusacións coas forzas da oposición ás que acusa de pretender "manchar" a imaxe do ex-rexedor franquista. Unha "ignominia" que, asegurou nunha carta aberta, non permitirá "mentres eu siga sendo alcalde".
O alcalde de Ribeira, Manolo Ruíz asegura que a iniciativa é unha "ignominia" coa que queren "manchar" o nome do rexedor falanxista
Desde o BNG lamentan que o alcalde "filtrara esta proposta á directiva da asoc. Amas de Casa antes de que os grupos políticos asinantes a fixeran pública" ao tempo que tamén sinten "o papel da secretaria e da presidenta de Amas de Casa, Magdalena Bringas, que empregan os seus cargos na asociación para exercer presión e coacción sobre os grupos políticos que ostentan a representación popular".
E é que as mulleres que integran o colectivo municipal de donas do fogar, "1.200 sociais e 300 persoas indirectas (maridos, fillos, pais)", din, remitiron unha misiva ao alcalde e a corporación municipal na que reclaman o mantemento da rúa dedicada a Manuel Rodríguez Bautista para o que esgrimen tres razóns.
No texto, afirman que "fue uno de los mejores alcaldes que se recuerda en Riveira. Gran defensor del pueblo, llegando en su gobierno, a llamarse Ia "CIUDAD BLANCA", por lo que él se preocupaba de que luciese limpia y pintada". Aliás, continúan, "se le achaca que fue falangista. ¿ Que otra cosa se podía ser en esa época siendo Alcalde?. Nunca tomó represalias contra nadie basandose en su cargo". Por último, entenden que, "El trastorno que ocasiona el cambio de nombre de una calle es evidente. Esa es una calle en la que vive mucha gente mayor, a la que le ocasiona un gran trastorno tener que cambiar la dirección a todas las comunicaciones que reciba".
As mulleres asociadas pregúntanse se "o concello e os seus edís non teñen outra cousa que facer" que se preguntaren por "cambios que a ninguén benefician" e instan a que "medite sobre o asunto".
A Asociación Amas de Casa defende a figura de Rodríguez Bautista: "foi un dos mellores alcaldes que se recorda"
![Publicidade 196259]()
Os grupos promotores da proposta apelan á lexislación vixente (52/2007) e ao artigo 15 da Lei de Memoria histórica no que se recolle a obriga das administracións públicas de "tomar as medidas oportunas para a retirada de escudos, insignias, placas e outros obxectos ou mencións conmemorativas de exaltación, persoal ou colectiva, da sublevación militar da Guerra Civil e da represión da Ditadura".
Neste senso lembran que Miguel Rodríguez Bautista foi rexedor durante 18 anos en Ribeira sendo recoñecido falanxista así como procurador en Cortes durante tres lexislaturas (1949-1959). Asemade, subliñan, mantivo cargos "en todas as esferas" do réxime ao longo da súa vida. Así pois, instan a cumprir a lexislación e a trocar o nome da rúa polo de Xosé Neira Vilas, algo que o alcalde do Partido Popular, dixo, non acontecerá "mentres eu siga sendo alcalde".
Imaxe tirada de El Correo Gallego na que se reproducen fotografías da visita de Franco a Ribeira acompañado de Miguel Rodríguez Bautista
