'Padova', undécima entrega do coleccionábel 'A historia marítima baixo as nosas augas'

O capitán do Padova retirouse ao seu camarote. Quitou o calzado e tras prender o gramófono, acendeu un cigarro e deitouse na cama mentres comezaba a soar, Otello de Verdi. Pechou os ollos e pensou na casa de Marsala a carón da praia, da que tantas veces lle insistira a súa muller de arranxar. Un paraíso. Unha táboa pregable facía de mesa onde había un libro sobre Pompeia, un cinseiro e unha foto del coa súa dona na festividade da patroa, Madonna Della Cava. Si… ao remate desta viaxe falaría con Guido, o seu cuñado, un bo albanel e aproveitando os cartos deste embarque satisfaría o soño de Fiore. O abaneo do barco detivo o disco. O capitán durmía alleo ao que estaba a piques de acontecer nas adegas do seu barco…