Non deixemos para mañá o que debemos facer hoxe

Acabou un mandato e o 17 de xuño comeza outro coa elección das alcaldías e as presidencias das deputacións. O tempo pasa moi rápido e, ás veces, quedan sen executar promesas electorais e incluso as propias leis. A Deputación de Pontevedra fixo un bo traballo nos últimos anos para a recuperación da memoria histórica e lembrar as vítimas do franquismo, cunha atención especial ás mulleres represaliadas. Unha das últimas iniciativas foi a campaña de memoria histórica "E se fose hoxe?", unha homenaxe ás vítimas do golpe de Estado de 1936 que defenderon a liberdade. A esquerda perdía a Deputación de Pontevedra nas eleccións do 28 de maio pola baixada de votos do PSdeG (19.000 votos menos en Vigo e dous deputados no partido xudicial) e a presidenta Carmela Silva manifestaba: "Non estaba previsto" que o PP gañase a Deputación. Non asumía ningunha responsabilidade o alcalde de Vigo, Abel Caballero –foi definido hai moito anos como "unha mala fotocopia de Paco Vázquez" por Julio Sacristán, alcalde socialista de Culleredo– e afirmaba que a Deputación "se perdió de una forma democraticamente inexplicable", e continuaba co discurso triunfalista: "No hay un precedente en la historia democrática de España". Por unha falta de vontade política ou de tempo (a Lei de Memoria Histórica aprobouse hai 15 anos), o caso é que acabado o mandato estas distincións continúan na Deputación de Pontevedra: Rafael Fernández Martínez, falanxista e gobernador civil na ditadura, ten a medalla de Ouro da provincia. José González-Sama García, falanxista e gobernador civil na ditadura, é Fillo Adoptivo da provincia. José Luis Taboada García, falanxista e gobernador civil na ditadura, é Fillo Adoptivo da provincia. Gonzalo Fernández de la Mora, ministro na ditadura, é Fillo Adoptivo da provincia e ten a Medalla de Ouro. Ramón Encinas Diéguez, falanxista e gobernador civil na ditadura, ten a Medalla de Ouro de provincia. José Luis Villar Palasí, ministro na ditadura, ten a Medalla de Ouro da provincia. Pío Cabanillas Gallas, ministro na ditadura, é Fillo Predilecto da provincia. Continúan existindo máis de 700 símbolos franquistas en case 100 concellos da Galiza Os tempos son chegados. Hai que acabar xa con máis de 700 símbolos franquistas en case 100 concellos de Galiza, unha auténtica vergoña nacional: 180 na Coruña, 52 en Santiago (entre eles, 20 ministros da ditadura conservan a distinción de Fillo Adoptivo), 48 en Ferrol, 37 na Deputación da Coruña. Predicar co exemplo Pontevedra xa eliminou moita simboloxía franquista, pero aínda conserva restos do franquismo: Fermín Gutiérrez Soto, militar golpista e capitán xeneral de Galiza, é Fillo Adoptivo e ten a Medalla de Ouro. Salvador Moreno Fernández, militar golpista e almirante na ditadura, é Fillo Adoptivo. Rafael Picó Cañeque, falanxista e gobernador civil na ditadura, é Fillo Adoptivo e ten unha rúa. Gonzalo Fernández de la Mora, ministro na ditadura, é Fillo Adoptivo. Ángel Ramírez de Cartagena, capitán xeneral de Galiza e director xeral da Garda Civil, é Fillo Adoptivo. Juan Antonio Suanzes, ministro na ditadura, é Fillo Adoptivo. Javier Puig Lamas, presidente da Deputación de Pontevedra na ditadura, ten unha rúa. Pío Cabanillas Gallas, ministro na ditadura, é Fillo Predilecto. Ramón Encinas Diéguez, falanxista e gobernador civil na ditadura, é Fillo Adoptivo. Ademais, Pontevedra conserva unha Cruz dos Caídos de 16 metros (a máis alta de Galiza), levantada nun terreo cedido polo concello á Falanxe en 1941 para "que perpetúe el recuerdo de los héroes que sucumbieron en defensa de los santos ideales de Religión y Patria en la gesta heroica de nuestra liberación"; é un monumento franquista, aínda que desde 1986 está branqueado como "Monumento al Soldado". Temos que falar hoxe da República e acabar coa monarquía cando están convocadas eleccións xerais para o 23 de xullo. A iniciativa da plataforma Galiza pola República, o concello de Sada –voto a favor de Sada Maioría, BNG e Alternativa dos Veciños, voto en contra do PP e abstención do PSdeG– aprobaba unha moción no pleno de 24 de setembro de 2020 que incluía, entre outros, o seguinte acordo: "Instar o Goberno do Estado a que inicie os procesos necesarios para a celebración dun referendo ou consulta á cidadanía sobre a forma de Estado: monarquía ou república". Por outra parte, o concello de Pontevedra, goberno BNG-PSdeG, acordaba o 15 de febreiro de 2021 substituír a avenida Juan Carlos I por Virxinia Pereira Renda, que a concelleira de Cultura explicaba así: "É unha cuestión ética máis que legal, é un exercicio inaprazable de decencia e hixiene democrática". Un bo exemplo para acabar coas rúas e distincións que Juan Carlos I conserva en numerosos concellos de Galiza.