Mesmo destapándose nos últimos meses os casos de bebés roubados por relixiosas durante a ditadura franquista, novo episodio dos xa múltiples cos que a investigación histórica confirma a participación das autoridades eclesiásticas do proceso represivo encabezado por Francisco Franco, a Igrexa decidiu onte facer ostentación da súa posición e organizar un acto multitudinario de beatificación en Tarragona, cunha compoñente españolista que non foi obviada nas múltiples críticas recibidas.
Con declaración de perdón e reconciliación, e un discurso do cardeal Angelo Amato, representante do Vaticano, encamiñado a despolitizar o acto, a lembranza para os milleiros de vítimas da represión franquista estivo ausente en todo momento. Ao mesmo tempo, a Coordinadora para a Laicidade e a Dignidade organizaba no cemiterio unha homenaxe ás persoas que padeceron a persecución e morte no franquismo. Cualificaron o acto da igrexa de “político, franquista e de insulto a quen perdeu aos seus familiares e sufriron represión”. A Coordinadora lembrou que a igrexa cualificara de “cruzara” o golpe de estado de Franco que contou sempre “coa bendición e o apoio da igrexa”. Lembraron que só se indemnizaron ás familias das vítimas “do bando dos vencedores”.
Para o colectivo Cristianismo en el siglo XXI é lamentábel que a igrexa “non pedira perdón polo seu papel naquel golpe de estado” e define o acto de Tarragona como “unha instrumentalización política das mortes ao servizo dun só bando”. Desde distintos grupos cristiáns púxose en evidencia que a Igrexa deixaba fóra do acto a curas catalanistas e vascos non beatificados por non seren franquistas.
En pleno proceso soberanista catalán, o compoñente españolista e anticatalanista do acto -ao que asistiron varios ministros- tamén foi amplamente criticado.