O BNG defendeu no parlamento unha proposición non de lei (PNL) na que se instaba o goberno galego a desenvolver unha “política pública sobre a memoria histórica”, que tivese a reparación das vítimas do franquismo en Galiza, a verdade e a xustiza como alicerces. Luis Bará, deputado nacionalista, explicou que a actual Lei de Memoria Histórica “é insuficiente” e non resolveu a reparación, as sentenzas e a Lei de Amnistía deixou de investigar crimes a pesar dos acordos internacionais. “Parécenos unha infamia e ofensivo para a memoria das vítimas que o PP continúe desobedecendo a organismos internacionais e mesmo o informe relator dos dereitos humanos da ONU”.
A lei galega proposta polo BNG procura “completar, ampliar e mellorar a Lei estatal”, que data do ano 2007, crear unha comisión da Verdade, “independente e de carácter oficial” que recupere ás vítimas que non aparecen nos rexistros oficiais, unha oficina de vítimas do franquismo que reactive o proxecto “Nomes e Voces” e que sexa creado tamén o Arquivo da Memoria Histórica de Galiza como centro público de investigación e divulgación con todo o material recompilado e que na actualidade fica “nun almacén”. Luis Bará reivindicou tamén declarar a Illa de San Simón, “Illa a da Memoria” e espazo central da loita pola memoria histórica democrática.
O Partido Popular, maioritario na Cámara, votou en contra da proposta presentada polo BNG.