Filla daqueles combatentes contra as ditaduras ibéricas que chamaron a atención do mundo co secuestro do rebautizado como Santa Liberdade, a deputada do Bloco de Esquerdas portugués Joana Mortágua pasou en Galiza unha data tan importante como a do 25 de Abril, na que participou nunha charla na Coruña ante máis dun cento de persoas organizada polo BNG.
O acto serviu para conmemorar o 40 aniversario da Revolución do Cravos, ademais de converterse nunha dura crítica á actual situación política de Portugal -e por extensión de Galiza- intervida polos poderes da UE e atravesando unha grave crise económica. “Na actualidade non temos poder político para defender as conquistas do 25 de Abril”, sinalou. “Todo o poder popular daquel proceso foi entregado á Troika e aos mercados, o que lle resta credibilidade a esta democracia, onde a política está subxugada aos intereses financeiros. Agora, corenta anos despois, estamos tendo que volver a emigrar, sinal que proba que están a derrotar un Abril que na miña xeración aínda non vimos”, engadiu a deputada, de 29 anos, que pula “pola unidade para acabar co réxime”.
Mortágua lembrou que entre @s protagonistas daquel rebelión “as ideas socialistas eran maioritarias pero a forza do imperialismo e a dependencia externa da burguesía converteu a revolución nunha transición”. Lamentou neste punto o papel da socialdemocracia, participou dun suposto consenso para instaurar un pacto de réxime apoiado pola OTAN e o que agora é a Unión Europea, proceso no que dixo ver bastantes semellanzas co ocorrido no Estado español. “A burguesía portuguesa nunca tivo un proxecto nacional, sempre estivo e mans do capital alleo e así foron capaces de mutilar as conquistas de Abril, mesmo a pesar de que se conseguiu unha democracia formal bastante avanzada. Nin sequera perdoaron iso nunca. O que sufrimos agora en Portugal é tamén unha vinganza contra a Revolución de hai corenta anos”.
A deputada do Bloco rematou a súa intervención esixindo que “a troika devolva o roubado” e asegurou que “o 25 de Abril e a Galiza Ceibe teñen en común unha característica: o Poder Popular”.
No acto tamén participaron Xosé Manuel Carril, voceiro local na Coruña e candidato ás Europeas do BNG, e o portavoz nacional da formación nacionalista, Xavier Vence, que denunciou que “malia non existir xa ditaduras militares, agora sufrimos a dos mercados”.
