Da ditadura, o galego “saíu ferido de gravidade, antes do franquismo estaba ferido, pero non de gravidade, despois do franquismo está máis debilitado”, destacou Henrique Monteagudo, coordinador do Seminario de Sociolingüística e vicesecretario da Real Academia Galega (RAG), na presentación dun estudo da súa autoría esta cuarta feira.
A obra, O idioma galego baixo o franquismo, presentouna o autor acompañado do presidente da RAG, Víctor F. Freixanes, a secretaria da institución, Margarita Ledo, e o director xeral da editorial Galaxia, Francisco Castro.
Monteagudo destacou que a ferida contra o galego ten moito que ver coa “actuación represiva directa” en contra da lingua, pero tamén cunha represión “difusa” que “alcanzou o conxunto da poboación e ten que ver coa mobilización a través de aparatos ideolóxicos”, explicou.
Todo isto, relatou, propiciou unha regresión na situación da lingua galega durante a etapa da ditadura.
Crónica de represión e resistencia
O presidente da RAG indicou que "é unha crónica necesaria dos esforzos da sociedade galega", reiterando que supón unha "crónica de represión e resistencia".
Ademais, fixo fincapé na necesidade de que a poboación, sobre todo a máis nova, teña nocións dunha “historia descoñecida” pero fundamental para entender a situación actual.
Ledo incidiu en que “houbo unha maquinaria desgaleguizadora” no franquismo, mentres que Castro cualificou o texto como un estudo “rigoroso”.
