O relator especial da ONU sobre cuestións das minorías, Fernand de Varennes, está no Estado español desde esta segunda feira até o 25 de xaneiro para obter información directa e sobre o terreo da situación de minorías como as lingüísticas, para alén de identificar boas prácticas e onde poder acometer melloras.
Ao longo destes 12 días, Varennes visitará Galiza e outros territorios, como Euskadi, Catalunya ou Andalucía. Alí manterá reunións con altos funcionarios, representantes da sociedade civil.
A visita analizará as políticas existentes para a protección e promoción dos dereitos de persoas pertencentes a minorías nacionais, lingüísticas, relixiosas e étnicas. Avaliará cuestións como o acceso a educación de calidade, a educación en linguas minorizadas ou os problemas de inclusión e a loita contra os discursos de odio, entre outras.