As achegas da profesora Pilar García Negro ao campo da investigación sociolingüística son incuestionábeis e os seus estudos sobre Rosalía, Lamas Carvajal, Castelao, Carvalho Calero, Jenaro Marinhas del Valle, Lois Diéguez, Marica Campo ou Pilar Pallarés son de coñecimento inescusábel para calquera persoa que queira ter un coñecimento cabal da evolución da literatura galega ao longo das últimas dúas centurias.
Co motivo da súa xubilación como profesora da Universidade da Coruña -institución na que dá aulas desde 1991-, o Grupo de Investigación Lingüística e Literaria organiza unha sesión académica consagrada á análise dos aspectos centrais da súa obra. A xornada pivotará arredor de dúas mesas redondas, a primeira hase de debruzar sobre os contributos da profesora en materia de investigación sociolingüística e a segunda terá como propósito analisar os seus estudos literarios.
A sesión, que leva como título xenérico o de Pilar García Negro, Pensamento, Pesquisa e Intervención, vaise desenvolver de acordo con este programa e terá lugar no salón de Graos da Faculdade de Filoloxía da UDC.
- 10.30-12 horas
A investigación sociolingüística. A lingua galega no contexto das linguas minorizadas
Robert Neal Baxter: Universidade de Vigo
Jaume Corbera: Universitat des Illes Balears
Goretti Sanmartín Rei: Universidade da Coruña
[Modera: X. R. Freixeiro Mato]
- 12.30 -14 horas
A investigación literaria. Os estudos rosalianos e outras aproximacións á análise da literatura contemporánea.
Anxo Angueira: Universidade de Vigo / Fundación Rosalía de Castro
Xosé L. Axeitos: Real Academia Galega
Kathleen March: Universidade Maine
[Modera: C. Fernández P-Sanjulián]
Unha actuación musical de Uxía porá o ramo a esta sesión, concluída a cal haberá un xantar de convivio no comedor da Faculdade de Arquitectura.
