martes 07.04.2020

Quen non ten sombra?

Quen non ten sombra?

borias.- Farfallán, mentirán, contista.

Exemplo.- "Non lle fagas caso a ese, que é un borias."

Lugar de escoita.- Lalín.

Fonte.- Ramiro Ferradás González.

bragante/a.- Persoa preguiceira, con pouca ansia para o traballo.

Exemplo.- "Es unha braganta, que sempre estás tirada no sofá."

Lugar de escoita.- Beade (Vigo).

Fonte.- Josefina Davila Davila.

escampabiar.- Escapar ou saír fuxindo para evitar facer algo ou para evitar algunha responsabilidade.

Lugar de escoita.- A zona de Amoeiro (Ourense).

Fonte.- Carlos Manuel Gómez Bóveda.

langrista.- (Ademais de significados xa rexistrados) Persoa maliciosa que anda mal metendo, enlizando a uns e outros con contos.

Lugar de escoita.- Zona de Navia de Suarna e Fonsagrada.

Fonte.- Kike de Vidal e Daniel Pando/Endl Navia de Suarna.

pancada (ter unha/darlle unha).- Cambio súbito de opinión ou de humor para peor, arrebato, arroutada.

Exemplo.- “Deulle unha pancada e entrou co tractor pola Cultural adentro.”

Lugar de escoita.- O Porriño e Salceda de Caselas.

Fonte.- Pedro Salgueiro Sexto.

penicamandís.- Persoa que se dedica a cociñar sen moitos coñecementos.

Lugar de escoita.- Xunqueira de Espadanedo.

Fonte.- Xesús Franco.

virillas.- Persoa que escatima esaxeradamente no que gasta ou no me dá; que dá o menos posible do que ten.

Exemplo.- “É un virillas, non hai quen lle faga pagar unha rolda.”

Lugar de escoita.- Bolmente (Sober).

Fonte.- Recollido por Ángeles Pérez, de Pacios. Enviado por Ramón Sandoval.

comentarios