PuntoGal comeza o mes de setembro cunha rebaixa de prezos moi interesante para aquelas empresas ou persoas que queiran facerse cun novo dominio. As e os interesados en obter o seu “.gal” pagarán un prezo máximo de 10 euros máis o IVE. Malia que esta promoción terá vixencia durante todo o mes, é recomendábel apurar para non ficar sen o nome completo que queren.
Un requisito para aproveitar esta oferta é dirixirse ás empresas rexistradoras Dinahosting, DonDominio, Blacknight, Openprovider, Entornio Digital, Arsys e OVH.com. Estas teñen distintas políticas de prezos e servizos con dominios novos. PuntoGal recomenda elixir un plan que se adapte a cadaquén e así o aclara na páxina web www.dominio.gal/promocions/.
Quen aproveite para mercar o seu “.gal” sumarase a unha familia que xa supera os 5.400 dominios rexistrados. Ademais, a compañía segue a traballar para gañar visibilidade para todas as persoas, institucións, asociacións ou negocios que quixeron amosar o seu apoio á comunidade galega desta maneira.
A nova campaña vén complementar outras iniciativas como #AbreNaRede, que facilitou un dominio e un aloxamento de balde a negocios ou artistas confinados, ou o concurso Vinte con outros ollos, recordando as vantaxes e oportunidades de apostar polas redes.
Segundo fontes de PuntoGal, o dominio mantén o seu programa corporativo de axuda a iniciativas relacionadas coa lingua, a cultura e as TIC na Galiza. Entre as actividades xa realizadas atópase a colaboración coa localización en galego do navegador Firefox ou o concurso de microrrelatos da Real Academia Galega (RAG).
