craviñar.- Acción de levar o fouciño á/ao ferreira/o para que lle poña o fío dereito e afiado.
Lugar de escoita.- Boiro.
Fonte.- Alumnado do CEIP Praia Xardín (recompilado polo EDLG do Centro).
cusichar.- Coser mal, sen xeito e á présa.
Exemplo.- “Vas estragar ese xénero se llo levas á Muchiña, non aprendeu máis que a cusichar.”
Lugar de escoita.- O Morrazo.
Fonte.- Dolores Acevedo.
Outros apuntamentos.- Grupo Maré do Morrazo, formado por Salvador Castro Otero, Lucía Durán Paredes, Xosé Manuel González Barreiro, Henrique Harguindey Banet, Xosé Martínez García, Ramón Rocamonde Gómez e María Emma Tilves Pazos.
legra.- (Ademais de significados coñecidos) Instrumento usado para tornear e traballos especiais en carpintería de ribeira.
Lugar de escoita.- Costa galega.
Fonte.- Javier Martín.
Outros apuntamentos.- Apunta a fonte que nos tempos en que non existía a electricidade, a legra era empregada polos/as torneiros/as que traballan con torno de vara ou pedal empregando madeira verde.
roza.- (Ademais de significados xa rexistrados) Apeiro de labranza utilizado para rozar, similar ao fouciño, pero de maior tamaño.
Lugar de escoita.- Santa Comba (Lugo).
Fonte.- Ana María (nai de Iria Vila Pozo).
Outros apuntamentos.- Enviada por Juncal Martínez, do IES Leiras Pulpeiro de Lugo.
suarego.- (Ademais de significados xa rexistrados) Traveseiro de madeira de quita e pon que se pon no fondo da porta da corte para deter o esterco.
Lugar de escoita.- O Courel.
Fonte.- Dun vocabulario courelao.
ter moito berengo.- Ter moito que facer, moito traballo, por exemplo, dun/ha labrego/a con moito gando ou diversas actividades.
Lugar de escoita.- Lier (Sarria).
Fonte.- María Xosé López Castro.
Outros apuntamentos.- Comenta a informante que llo escoitou á súa nai.
