acomerar.- Dar de comer. A palabra foi escoitada en participio e facendo referencia a animais.
Exemplo.- "Os cans xa están acomerados." (xa se lles deu de comer).
Lugar de escoita.- Nebra (Porto do Son).
Fonte.- Anxo Tarrío.
anguear.- Expresión utilizada cando un can foxe laiándose dun ataque, ou cando ten fame, frío, etc.
Exemplo.- “Voulle dar un pau a ese cadelo e vai anguear todo o día.”
Lugar de escoita.- Cerdedo, Sabucedo, Forcarei, Herbón (Padrón).
Fonte.- Manuel Cabada Castro.
Outros apuntamentos.- Outro informante (do concello de Vila de Cruces) estende, porén, o significado de “anguear” tamén ás vacas, ó me informar de que destas se dicía que “angueaban” cando saían da corte cheas de fame pra ir mantelas a unha veiga ou ó monte.
axar.- (Ademais de significados xa rexistrados) Levantar o voo as aves. Tamén se di cando o vento eleva calquera cousa.
Exemplo.- "Non colgues a roupa fóra, que che vai axar co vento."
Lugar de escoita.- Carbeiral-Bardaos (San Sadurniño).
Fonte.- Avelino Sanjurjo Beceiro.
bormo.- (Ademais de significados xa rexistrados) Enfermidade que collen as bestas por comer herba verde, que lles produce moco.
Lugar de escoita.- Aldariz (Lousame).
Fonte.- CPI de Lousame.
Outros apuntamentos.- A fonte indica que para botar fóra esa enfermidade cómpre facerlles respirar follas de eucalipto queimadas.
extramontar.- Escapar o gando a outro monte.
Lugar de escoita.- O Courel.
Fonte.- Dun vocabulario courelao.
perico.- (Ademais doutros significados) Deposición de burro.
Lugar de escoita.- Salceda de Caselas.
Fonte.- Pedro Salgueiro Sexto.