cachurra.- Sensación de peso ou de malestar na cabeza por efecto de catarro, gripe, etc.
Exemplo.- “Ando con cachurra, penso que estou chocando algo.”
Lugar de escoita.- O Morrazo.
Fonte.- Serafín Parcero.
Outros apuntamentos.- Grupo Maré do Morrazo, formado por Salvador Castro Otero, Lucía Durán Paredes, Xosé Manuel González Barreiro, Henrique Harguindey Banet, Xosé Martínez García, Ramón Rocamonde Gómez e María Emma Tilves Pazos.
escotelada.- Golpe no pé descalzo contra algo duro que hai no chan.
Lugar de escoita.- Corme.
Fonte.- Vocabulario cormelán.
Outros apuntamentos.- Asociación Veciñal de Corme. Esta palabra foi deixando de usarse a medida que os pés foron calzándose.
galoxo.- Bocio. Inflamación das tiroides pola falta de iodo.
Exemplo.- “O meu tío ten galoxo.”
Lugar de escoita.- Recollido do relato de Ánxel Fole, "Terra do Courel", Á lus do Candil.
Fonte.- Sara Criado.
penquear.- Ter un pequeno defecto físico ou psíquico.
Exemplo.- "Manolo penquea dun oído.”
Lugar de escoita.- Castrelo (Forcarei).
Fonte.- Manuel Cabada Castro.
transpintar.- Efecto de anubramento dos ollos ou de dobre visión ao fixar a vista sobre un obxecto, cousa que pode chegar a producir na persoa sensación de mareo.
Lugar de escoita.- Ferrolterra.
Fonte.- Henrique Dacosta.
valdropío.- Especie de mal que lle da ás persoas cuxo proceso dixestivo é instantánteo, e que en canto comen xa teñen que ir evacuar. Pode asimilarse coa bulimia.
Exemplo.- “Este rapaz parece que ten o valdropío!”
Lugar de escoita.- Catoira.
Fonte.- Elsa Ramos.
Outros apuntamentos.- Desde a APAMP (Vigo).