aitar.- Aplicado a un/ha neno/a, que non crece e se desenvolve de acordo co esperado para a súa idade.
Exemplo.- “Como a nena non lle aitaba, levouna a riscar a Vilacoba.”
Lugar de escoita.- Santa María de Taboexa (As Neves).
Fonte.- María Isabel Fernández Vidal.
balbeirón.- Golpe forte.
Lugar de escoita.- Gondaísque (Terra Cha).
Fonte.- Antonio Eimil.
loro (1).- (Á marxe doutros significados coñecidos) Golpe na cabeza ou nun obxecto.
Exemplo.- "Levei un loro no coche e teño que levalo ao taller."
Lugar de escoita.- O Barbanza.
Fonte.- Constantino Prego.
marreca.- Especie de corcova.
Exemplo.- “Séntateme ben que vas coller marreca!”
Lugar de escoita.- Budiño.
Fonte.- Deolinda Alonso.
Outros apuntamentos.- Desde a APAMP (Vigo).
pexega.- Tara ou eiva que deixa nunha persoa un accidente ou unha enfermidade.
Exemplo.- “A rotura do brazo deixoulle unha pexega, non pode peitearse pola caluga.”
Lugar de escoita.- O Morrazo.
Fonte.- Marisa Fandiño.
Outros apuntamentos.- Grupo Maré do Morrazo, formado por Salvador Castro Otero, Lucía Durán Paredes, Xosé Manuel González Barreiro, Henrique Harguindey Banet, Xosé Martínez García, Ramón Rocamonde Gómez e María Emma Tilves Pazos.
pisquirindo.- Mirrando, indo a menos, en declive. Escoitado referíndose a xente anciá.
Exemplo.- "Ultimamente o avó vai pisquirindo."
Lugar de escoita.- A Pena (Sarria).
Fonte.- Andrés Lombardía Crespo.