A Coordinadora de Traballadores e Traballadoras de Normalización da Lingua (CTNL) crea e convoca os Premios Mil Primaveras a proxectos de posta en valor e fomento do galego coa finalidade de cubrir un oco nos premios de normalización da lingua.
Con esta iniciativa preténdese “difundir o labor ilusionante e necesario de promoción da lingua que desenvolven servizos de normalización lingüística, equipos de normalización e dinamización lingüística, asociacións e outras entidades públicas e privadas”, así como “valorar e espallar o bo traballo que se fai no campo da normalización lingüística”.
Os premios recoñecerán accións, programas, campañas, proxectos etc. que teñan como obxectivo a promoción do uso e do prestixio da lingua galega.
Os premios abranguen seis categorías: Premio ao mellor proxecto estabilizado, ao mellor proxecto novo, á mellor comunicación e impacto, ao proxecto máis innovador, ao mellor proxecto de fomento do galego na infancia e/ou mocidade e ao mellor proxecto de fomento do galego nun ámbito sectorial.
A participación nos premios é voluntaria e a presentación dos programas de normalización lingüística candidatos deben facela as propias entidades que os desenvolveron. Todas as candidaturas deberán ser de programas, proxectos ou accións xa desenvolvidas e con vixencia total ou parcial en 2017, 2018 e 2019; non se valorarán propostas de accións pendentes de levar a cabo.
