Este sábado 20 de marzo a Casa Rosalía, en Padrón, acollerá a celebración do Día dos Medios en Galego co programa #MoitoqueSachar. Un evento que ía se celebrar, conmo todos os anos, o 7 de febreiro mais que a pandemia obrigou a adiar.
A Casa Museo de Rosalía acollerá a emisión dun programa especial presentado por Federico Pérez Rey, unha das caras máis visíbeis do audiovisual galego, que estará acompañado pola música ao vivo dunha banda formada por Iván Barreiro, á guitarra; Carlos Arévalo, á batería; e Ale Casquero aos teclados.
Será unha festa da lingua, con entrevistas, sketches, o nacemento dun novo proxecto, así como sorpresas que demostrarán o papel fundamental do galego como principal motor da comunicación no noso país.
O programa será retransmitido en directo nas nosas canles de Youtube, Facebook e Twitch. Ademais, tamén se emitirá o domingo ás 21:30h en NósTelevisión e a segunda feira ás 18:00 horas en todas as emisoras municipais galegas da rede de Radiofusión. O
O evento conta coa colaboración da Secretaría Xeral de Política Lingüística e a Deputación da Coruña, ademais do apoio da Casa Rosalía.
A Asociación de Medios en Galego (Amega) fixaba en xaneiro de 2018 a data de 7 de febreiro como o Dia dos Medios en Galego, “unha boa ocasión para visibilizar os medios de comunicación que utilizan a lingua galega e poñen o foco na realidade do país”.
A data procuraba homenaxear ‘O Tío Marcos d'a Portela’, nado en febreiro de 1876. A histórica publicación foi a primeira escrita integramente en galego. Subtitulada “Parrafeos co pobo galego” e impulsada por Valentín Lamas Carvajal, conseguiu un notable éxito, chegando a vender 4.000 exemplares nunha comunidade que daquela contaba con altos niveis de analfabetismo.
En febreiro dese mesmo ano, 2018, O presidente do Parlamento, Miguel Santalices, deu lectura a unha declaración institucional co gallo do 7 de febreiro, Día dos Medios en Galego, convidando a sociedade galega a “apoiar esta reivindicación”.
