Eu e tu/ti son formas do pronome persoal que realizan na frase a función de suxeito :
Eu penso que a cousa está difícil
Non hai queixa ningunha do que eu fago
Que cres tu/ti que podemos facer?
Tu/ti e eu dámolo feito ben
Min e ti realizan outras funcións como as de complemento con preposición. Digamos o mesmo por medio dunha construción con preposición :
Para min que a cousa está difícil
Non hai queixa ningunha de min
Segundo ti : que podemos facer ?
Entre ti e min dámolo feito ben
Neste último exemplo o ti e min é o correcto galegoportugués fronte ao calco do español entre ti e eu.
Agora ben, se —mesmo con preposición— o pronome persoal fose facendo de suxeito dun verbo (en infinitivo, por exemplo) a forma daquel sería eu ou tu/ti
Para eu facelo terían que mo rogar moito
Min e ti son tamén as formas que se utilizan no segundo elemento das comparacións e mais en construcións similares (e non eu ou tu) :
Ela é máis nova ca ti
Queres saber tanto coma min
Tu/ti fai coma min
Coa mesma, imos agora coa locución que citabamos: De min a ti. Esta frase tan tradicional vén equivalendo a Se eu fose ti, De eu estar no teu lugar… etc. (o español Yo en tu lugar…)
De min a ti non llo dicía
Igualmente a expresión pode marcar a confidencialidade do que se conta, similar ao inter nos latino que empregamos con frecuencia:
De min a ti: anda con tino con esa xentiña
E, naturalmente, pode ter o seu valor literal e direccional na frase :
De min a ti sempre houbo moito cariño
Lembremos outra locución ben tradicional: a do verbo ter co pronome persoal en obxecto indirecto e co significado de ‘considerar, pensar, estimar’, etc:
Teño para min que o asunto é grave
Digamos como remate que para ‘falar cunha persoa con proximidade e familiaridade, tratándoa co pronome persoal tu/ti, a normativa propón o verbo atuar aínda que tamén existen atutar e tutear (esta variante existe en portugués). De todos os xeitos, seguen moi vivas locucións como falar de ti/tu a alguén e mais tratar por tu/ti ou aínda tratar ti por ti.
E velaí unha cantiga con catro pronomes persoais :
Se soubera que ti dabas
pasadiñas por me ver
tamén eu che prometera
de outros amores non ter