sábado 19/06/21
Exposición

Hai ou non hai cancións abondas en galego? En Pontevedra sábeno!

Laiármonos de que non haxa cancións suficientes en lingua galega é cousa do século pasado. Pontevedra amosa a enorme diversidade musical no idioma propio da Galiza cunha exposición que pode visitarse todo este mes de maio na praza de Ourense.

canta
Xornada de inauguración da exposición, que pode verse todo o mes de maio na praza de Ourense de Pontevedra (Imaxe: Nós Diario)

“Cantámola en galego” é a exposición sobre a música que recolle mostras das dúas primeiras décadas do século XXI. Unha mostra que pode gozarse todo o mes de maio na praza de Ourense da cidade de Pontevedra e que está comisariada polo crítico de música Pepe Cunha e pola xornalista Teresa Cuíñas.

Trátase dunha iniciativa transmedia, impulsada polo Concello de Pontevedra, que amosa a diversidade musical en galego e que, á vez, celebra a revolución musical no século XXI na Galiza.

Catorce paneis, listaxes en Spotify e YouTube e unha unidade didáctica, da autoría da escritora e profesora Rosalía Fernández Rial, permiten coñecer toda a variedade de estilos, formacións e solistas que compoñen o panorama musical en galego a día de hoxe.

Visita guiada

Para coñecer de primeira man a música en galego das dúas últimas décadas, a Concellaría de Normalización Lingüística organiza unha visita guiada a próxima terza feira, 25 de maio, con Pepe Cunha e Teresa Cuíñas, ás 19 horas ou ás 20 horas, con inscrición previa nesta ligazón.

A partir de setembro, a exposición adoptará formato itinerante para achegarse a centros de ensino, centros sociais e mesmo a outros concellos.

Pódese descargar a listaxe de reprodución en Spotify aquí, acceder á canle de Youtube con algúns vídeos de mostra aquí e descargar a unidade didáctica recomendada e o catálogo da exposición aquí.

comentarios