O bretón Emmanuel Le Merlus, presidente da asociación 'Unatet e liesseurted ar yezhou' (Unidos na diversidade lingüística) leva dous anos percorrendo toda Europa en bicicleta en defensa das línguas minorizadas. Comezou en maio de 2010 en dirección a Kernow e desde entón xa estivo, entre outros lugares, en Calabria, Catalunya, Occitania, Sardinia e Macedonia. Para realizar a viaxe conta co apoio de varias institucións como os Consellos Rexionais de Bretagne, Finistère, Côtes d'Armor e Morbihan e a colaboración das escolas bretoas Diwan.
No seu blogue comenta cada visita que realiza e as persoas que coñece. "Antes de comezar a miña viaxe procurei informarme sobre o contexto social e cultural destas línguas minoritárias" asegurou desde Portugal ao xornal Mensageiro de Bragança.
Emmanuel Le Merlus comezou a súa viaxe hai dous anos e xa estivo en numerosos países de Europa
Hoxe participará en Lugo nun acto no que falarán Olga Novo, escritora e profesora de galego primeiro na Universidade da Alta Bretaña en Rennes, e de literatura na Universidade Bretaña Sur, en An Orient, sobre "A Bretaña nos escritores galegos", Luis Villares, maxistrado titular do xulgado Contencioso Administrativo nº 2 de Lugo, que falará sobre "A Carta Europea das Línguas", e o propio Emmanuel Le Merlus que comentará o seu "Tour pola Europa das Línguas". A xornada divulgativa terá lugares ás 20:30h no Museu Provincial de Lugo.
Imaxe: Ouest-France
