O Celta marxina o galego en Twitter

O RC Celta vén de anunciar unha nova conta en Twitter "para comunicarse cos seus afeccionados en galego". Unha conta secundaria, diferenciada da oficial. A afección clama contra a iniciativa, que asume como un paso máis na desgaleguización do club. 
O RC Celta crea unha segunda conta en Twitter para chiar só en galego.
photo_camera O RC Celta crea unha segunda conta en Twitter para chiar só en galego.

Con esta segunda conta específica para a comunicación en galego, o Celta "reafirma a súa identidade e reforza o seu compromiso co idioma galego", salienta o club, "que informará aos seus afeccionados exclusivamente nesta lingua".

Segundo revela o equipo celeste nun comunicado, os seus seguidores atoparán en @RCCeltaGL toda a información sobre o club e o equipo en galego, "idioma que a entidade celeste utiliza de maneira habitual en todo tipo de comunicacións coa súa afección".

Mais as reaccións caeron en tromba: por que relegar a lingua propia, da que fan gala e proclaman no día a día, a unha conta secundaria? Por que non facer da conta oficial do RC Celta en Twitter a casa principal do galego?

O club xustifica o seu xesto na rede social e apunta que se "ao resto de equipos que interactúan cos seus afeccionados con contas específicas das súas dúas linguas cooficiais, como FC Barcelona, Athletic Club, Real Sociedad, Valencia, Levante, Osasuna, Villarreal, Elche ou Alavés".

Fútbol e lingua

Segundo detalla, o FC Barcelona dispón de 18,1 millóns de seguidores na súa conta en castelán e de 6,7 millóns na de catalán. O Athletic Club ten 939.000 seguidores no seu perfil de Twitter en castelán e preto de 76 mil no que utilizan o eúscaro. A Real Sociedad ten 684.200 e 21.800 respectivamente; a Valencia conta con 1.3 millóns de seguidores en español e 38.600 en valenciano; o Levante 435.200 mil e 1.350 en valenciano, Osasuna 259 mil en español e 3.840 en éuscaro. Pola súa banda, o Villarreal dispón de 556.800 mil en español e 1.850 en valenciano, o Elche de 248.500 mil e 2.200 en valenciano e o Alavés ten 235 mil en castelán e 2.770 en éuscaro.

"O RC Celta ten máis de 497.300 seguidores na súa conta de Twitter, dos que tres de cada dez son galegos", conclúe.
"Un paso adiante de gran importancia" declara a entidade celeste, co que "reafirma o seu compromiso cun idioma que marca a inequívoca identidade do Real Club Celta".

Mais parte da afección galega discrepa. E non é a primeira vez que o fai a conta da lingua e do prestixio que os seareiros e seareiras do equipo lle reclaman ao club.

Marxinación, vergoña, segregación... son algúns dos cualificativos compartidos polos seguidores e seguidoras do Celta nas primeira horas após a creación da conta exclusiva para o uso do galego, que moitos apostan por converter na principal.

Mesmo hai quen leva a conta da perda de seareiros na oficial tras o anuncio da segunda, a piques de superar o millar de seareiros.

Comentarios