Lisa Wedeen e o director sirio de TV Allais Hajou falarán no CCG sobre a ideoloxía e o humor en Siria

A profesora de Ciencia Política na Universidade de Chicago (EE.UU.) e especialista en Oriente Próximo, Lisa Weeden, e o director sirio de series televisivas de humor, Allais Hajou, participarán o 21 de xuño (ás 16:30 horas no Consello da Cultura Galega)  nunha nova sesión do seminario interdisciplinar O(s) Sentido(s) da(s) Cultura(s). Neste caso a palestra tratará sobre “Ideoloxía e humor en tempos escuros. Notas desde Siria”, un país no primeiro plano da atención e a preocupación internacionais.

Lisa Wedeen: "A comedia e a risa serven para desenvolver un importante labor ideolóxico"

O caso Sirio
Lisa Wedeen é profesora de Ciencia Política na Universidade de Chicago con liñas de investigación centradas en política comparada, Oriente Próximo, teoría política, teoría feminista e métodos cualitativos. Allais Hajou, é un dos directores de televisión máis coñecidos de Siria, autor de series de éxito como “The Lost (forgotten) Village,” Day`a, Daay`a, 2010 ou “Winds of Ruin,” Riyah al-Khirba 2011. Politóloga e realizador analizarán diversas series televisivas e a complexa relación entre ideoloxía e humor no réxime sirio. “A comedia e a risa que esta provoca, afirma Lisa Wedeen, serven para desenvolver un importante labor ideolóxico, unhas veces reforzando as convencións políticas e outras presentándolles grandes desafíos”.