O presidente de Ucraína, Volodimir Zelenski, interviu na tarde desta terza feira ante o Congreso español, nunha comparecencia telemática na que comparou a situación de guerra que vive o seu país cos bombardeos en Gernika de 1937, durante a Guerra Civil española, a pesar de que ambos os casos, a nivel político, non teñen demasiado en común.
Na súa intervención, que comezou cun lixeiro retraso, o dirixente ucraíno asegurou que en Ucraína "está ameazada toda a vida común" da poboación.
Zelenski acusou Rusia de levar a guerra a Ucraína en 2014, coa "ocupación de Crimea", e sinalou que ante iso están a "defender o seu Estado contra esa agresión, a maior desde a Segunda Guerra Mundial".
Segundo o presidente ucraíno, o seu homólogo ruso, Vladimir Putin, quere "destruír a nosa posibilidade (de Ucraína) de vivir sen ditadura, a nosa posibilidade de ser unha democracia aberta".
"Horrores" da guerra
Zelenski fixo referencia aos "horrores" da guerra, e sinalou que, pese a estar en 2022, Ucraína está como Gernika en abril de 1937, cando foi bombardeada por cazas enviados polo fascismo italiano e alemán.
Ao igual que na súa comparecencia no Congreso dos Estados Unidos (EUA), na que lembrou o bombardeo xaponés de Pearl Harbor, Zelenski tratou de sensibilizar a sociedade do Estado español traendo á memoria o que é considerado o primeiro ensaio de guerra total da historia, pese a que non manteña relación coa actual situación de Ucraína.
"Quedan só ruínas nas nosas cidades ocupadas, 90% dos edificios están derruídos. Os rusos bombardean lugares nos que saben que hai nenos", engadiu.
Na súa comparecencia, tamén sinalou empresas españolas como Porcelanosa, Sercobe e Maxam por "facer negocios con Rusia", e exixiu que deixen de traballar no país.
Resposta de Pedro Sánchez
Ante a petición de Zelenski de máis armamento e maiores sancións para Rusia, o presidente do Goberno español, Pedro Sánchez, recolleu as palabras do seu homólogo e afirmou que o Estado español seguirá a apoiar Ucraína, tanto con armamento como con "axuda humanitaria".
"O Estado español condena coa maior determinación esta guerra despiadada de Putin contra Ucraína", manifestou Sánchez, que, como a pasada semana, personalizou no presidente ruso as causas da guerra en Ucraína.
Novas vexacións en Dnipró
Paralelamente, e no medio das acusacións enfrontadas polas mortes en Bucha, onte tamén apareceron imaxes nas que supostamente se realizan vexacións e se golpea a cidadáns ucraínos "prorrusos".
Nos vídeos, pódese observar como persoas ataviadas coa indumentaria dos Servizos de Seguridade Ucraínos (SBU) colocan en fileiras, maniatan, gravan, insultan e dan malleiras até provocar fortes hemorraxias a cidadáns. Nalgunhas das malleiras incluso chegan a espir forzadamente as persoas. Os golpes e o sangue en zonas vitais como a cabeza son xeneralizados.