O Tribunal Especial para o Líbano afirmou onte que non hai evidencia de os líderes de Hezbolá ou o Goberno de Siria estaren involucrados no atentado de 2005 que matou o ex primeiro ministro do Líbano Rafiq Hariri.
O tribunal da ONU leu onte a sentenza do xuízo contra catro membros da organización xiíta aliada do Irán acusados en ausencia de conspiración para matar a Hariri e outras 21 persoas.
"A sala de xuízo opina que Siria e Hezbolá poden ter motivos para eliminar o señor Hariri e os seus aliados políticos, con todo, non hai evidencia de que o liderado de Hezbolá estea involucrado no asasinato do señor Hariri e non hai evidencia directa da participación de Siria", afirmou o xuíz David Re, presidente do tribunal, na lectura dun resumo da decisión de 2.600 páxinas.
O veredicto de culpabilidade podía agravar as tensións no Líbano, conmocionado polas explosións de hai dúas semanas no porto de Beirut que provocaron a morte de 180 persoas e deixaron máis de 6.000 feridos.
Rede de telecomunicacións
Hariri era o político sunnita máis destacado do Líbano no momento do seu asasinato, o 14 de febreiro de 2005. O xuízo centrouse no suposto papel de catro membros de Hezbolá no atentado suicida cun camión bomba que matou o político e outras 21 persoas e deixou ademais 226 persoas feridas.
Os fiscais basearon o caso principalmente en datos de teléfonos móbiles supostamente utilizados polos conspiradores para planificar e executar o atentado. Sen os datos do teléfono, non habería caso contra os catro sospeitosos, dixo Re, mentres comezaba a explicar a complexa investigación sobre a rede de telecomunicacións que os fiscais din que os sospeitosos utilizaron.
Na lectura das conclusións, Re dixo que as evidencias extraídas desas telecomunicacións no caso eran "case totalmente circunstanciais". Con todo, outra xuíza, Janet Nosworthy, dixo máis tarde que os xuíces ditaminaran que catro redes diferentes de teléfonos móbiles "estaban interconectadas e coordinadas entre si, e operaban como redes encubertas nos momentos pertinentes".
Case 300 testemuñas
Durante o xuízo, que comezou en 2014 e durou 415 días de audiencias, o tribunal de Leidschendam, perto da Haia, escoitou as probas de 297 testemuñas e inicialmente xulgáronse cinco sospeitosos, todos eles membros de Hezbolá.
Os cargos contra un dos principais comandantes militares do grupo, Mustafa Badreddine, retiráronse logo da morte del en Siria en 2016. O resto de sospeitosos son Salim Ayyash, tamén coñecido como Abu Salim; Assad Sabra, Hassan Oneissi, quen mudou o seu nome a Hassan Issa, e Hassan Habib Merhi.
As acusacións inclúen delitos de conspiración para cometer un acto terrorista. As condenas determinaranse en audiencias posteriores. A sentenza máxima sería a cadea perpetua, aínda que é probábel que ningún deles cumpra condena, xa que Hezbolá prometeu non entregar ningún dos sospeitosos.
"Complot de Israel"
O asasinato foi visto por moitos no Líbano como obra do Goberno de Siria, unha acusación que Damasco nega. Algúns libaneses ven o tribunal como unha forma imparcial de descubrir a verdade sobre o asasinato de Hariri, mentres que Hezbolá tamén negou sempre a súa participación no atentado e considera que se tratou dun complot israelí para danar o grupo.
