Reafirma a dirección política sobre as empresas estatais

Xi Jinping, elevado ao rango de “núcleo” do Partido Comunista de China

Xi Jinping, presidente da República Popular da China, xa está á altura simbólica de Mao e Deng Xiaoping. Así o decidiu esta semana en Beijing o sexto plenario do Comité Central do gobernante Partido Comunista.

Sexto plenario Partido Comunista da China
photo_camera Un aspecto do plenario

En 1989 Deng Xiaoping alcuñou o termo “núcleo” para se referir ao principal órgao unipersoal do partido gobernante na China. Non todos os secretarios xerais alcanzaron ese rango. Déuselle a Mao Zedong a título póstumo e tamén o tivo Jiang Zeming. Non así Hu Jintao, o predecesor de Xi Jinping, quen agora -catro anos após a súa chegada á cimeira do partido- alcanza esa altura.

Aliás, o partido, nun comunicado oficial en que dá conta do nomeamento de Jinping como “núcleo”, reafirma a preeminencia da dirección colexiada. “A lideranza colectiva debe ser sempre respeitada e non deberá ser violada por ningunha organización ou individuo baixo ningunha circunstancia ou razón”, afirma.

O sexto plenario do Comité Central reuniuse en Beijing por espazo de catro días -de segunda a quinta feira- co propósito de preparar o próximo congreso do partido, que irá decorrer no outono de 2017. Nel en teoría Xi Jinping sería reeleito para un segundo mandato e nel tamén tería que ir dando pistas sobre a persoa na que aposta como o seu sucesor.

Xi Jinping aproveitou unha reunión con directivos das principais empresas do país para reafirmar o principio da “dirección” do partido comunista sobre o xigantesco conglomerado de empresas estatais

Nas vésperas deste plenario, Xi Jinping aproveitou unha reunión con directivos das principais empresas do país -neste momento o segundo PIB do planeta- para reafirmar o principio da “dirección” do partido comunista sobre o xigantesco conglomerado de empresas estatais, hexemónicas nos sectores estratéxicos da economía.

“A lideranza do partido sobre as empresas estatais é un principio político fundamental e debemos perseverar nese principio”, dixo.

Destarte, Xi Jinping reforza o seu rol ao fronte dun partido que en apenas 5 anos celebrará o seu centenario (2021). O obxectivo estratéxico, remarca o estatal Diario do Pobo, é conseguir facer de China un “país socialista moderno” á altura de 2049, cen anos despois da fundación da República após a vitoria de Mao na guerra civil.

Comentarios