O presidente do País Valencià, Ximo Puig, foi quen abriu a lata a cuarta feira mentres en Madrid decorría a sesión de control no Congreso, sinalando que o referendo de autodeterminación defendido desde o Goberno de Catalunya “non cabe na Constitución”, mais “si caben outro tipo de referendos e hai outras maneiras de plebiscitar sobre unha solución”.
Na mañá desta quinta feira foi o Ministro de Política Territorial e Función Pública e primeiro secretario do PSC, Miquel Iceta, que sostivo que se tería que votar en referendo consultivo “un grande acordo sobre autogoberno, financiamento e participación das comunidades autónomas no deseño das políticas do Estado”, unha vez que a mesa de diálogo bilateral entre o Estado e Catalunya chegue a algún acordo.
“Non é tan importante o que se poña sobre a mesa senón a vontade de achegar posicións e que cheguemos a unha solución que poida satisfacer de forma razoábel unha maioría”, defendeu, antes de prever que o pacto no seo dun “instrumento específico” como a mesa de diálogo vai ser adiada no tempo.
En Catalunya hai “uns problemas de financiamento que todo o mundo acepta”, explicou Iceta, que recoñeceu o lastre que supón a carencia de estruturas federais, “que é o que permitiría compaxinar o autogoberno co Goberno compartido”.
Ademais, amosouse confiado en que isto é o inicio “dun camiño que nos debe levar a un Estado verdadeiramente federal”.
Pola súa banda, a vicepresidenta primeira e ministra de Memoria Histórica, Carmen Calvo, reiterouse na posición de Pedro Sánchez onte no Congreso, abrindo a porta a "todo o que poida estar no marco da legalidade constitucional”.
"Haberá referendo"
Desde Catalunya, o presidente Pere Aragonès mantivo que "haberá un referendo" de autodeterminación para que "decida a xente", despois da visita de Oriol Junqueras, Carme Forcadell, Raül Romeva e Dolors Bassa á secretaria xeral de ERC, Marta Rovira, que se atopa exiliada en Xenebra (Suíza) desde 2018.