Nove fotografías dun mundo en transición

O 14 de abril Xi Jin Ping, presidente da República Popular da China, recibía en Beijing Lula da Silva, presidente do Brasil. Houbo varias mensaxes importantes: o fortalecemento das relacións comerciais entre Beijing e Brasilia, a aposta polo diálogo e a negociación na crise ucraína e, sobre todo, a aposta por unha orde internacional xusta e equitativa máis a defensa dunha orde mundial multipolar. Esta fotografía tivo continuidade o 26 de abril cunha reunión na Moncloa entre Lula e Pedro Sánchez onde o Brasil volveu deixar clara a súa posición en contra do envío de armas a Ucraína e en favor dunha saída dialogada ao conflito bélico. En paralelo, o 19 de abril, o chanceler da Federación Rusa Serguéi Lavrov era recibido en Caracas por Nicolás Maduro, facendo un chamado á unidade venezolana en defensa do dereito dos pobos para determinar o seu propio futuro, o seu destino sen inxerencias externas, sen ditados nin chantaxes. E, por suposto, sen intentos de influír a través de medidas restritivas unilaterais e ilegais que agora practica o Occidente colectivo. É dicir, unha posición contundente contra o bloqueo e as sancións a Venezuela. De Estados Unidos a Rusia A segunda parte desta fotografía tivo lugar o 24 de abril coas Nacións Unidas como sede, onde o propio chanceler Lavrov acusou os Estados Unidos, de maneira paradoxal, pero real, de pretender destruír a globalización, ao mesmo tempo que denunciaba a ausencia de países de África ou América Latina como membros permanentes do Consello de Seguridade e criticaba fortemente a hipocrisía da OTAN. Unha quinta fotografía produciuse o 20 de abril cando Joe Biden recibiu na Casa Branca a Gustavo Petro. Na axenda, a paz nunha Colombia que conta con sete bases militares estadounidenses no seu territorio, moi perto da Amazonía pero tamén moi perto dunha Venezuela (do petróleo venezolano, en realidade) coa que o Goberno colombiano restabeleceu relacións políticas. Antes desta reunión, Petro xa sentenciara en Nacións Unidas en 2022 que o consumo de petróleo das grandes potencias era máis letal que a cocaína. Desta fotografía derivan outras catro imaxes, todas elas datadas o 25 de abril. Por unha banda, o propio Biden, con 80 anos, anunciou que se postularía a unha reelección á que en caso de gañar, chegaría con 82 anos. Co lema 'Terminemos o traballo', e coa presenza asegurada como candidata á Vicepresidencia de Kamala Harris, quizais o máis interesante sexa o anuncio de que a coordinadora de campaña será Julie Chávez Rodríguez, un perfil que indica que o voto latino será clave en 2024. Tamén o 25 de abril, Suráfrica, por medio do seu partido gobernante, o Congreso Nacional Africano do histórico Nelson Mandela, expuña a súa saída da Corte Penal Internacional. O motivo, Sudáfrica presidirá en agosto un cumio dos BRICS (Brasil, Rusia, India, China e Sudáfrica) á que é moi posíbel que acuda un Vladimir Putin que ten unha orde de arresto da propia CPI por "deportación ilegal de nenos ucraínos" en zonas ocupadas tras a intervención militar rusa. De Colombia aos Estados Unidos Petro foi rotundo cando ao finalizar o cumio afirmou: "América non pode ser un espazo de sancións" Doutra banda, e en Bogotá, tiña lugar un cumio auspiciado por Gustavo Petro para encarreirar as negociacións entre o Goberno venezolano e unha oposición que quere garantías para as eleccións presidenciais que decorrerán tamén en 2024. O saldo do encontro foi un achegamento entre as partes e posicións comúns ao redor da necesidade de estabelecer un cronograma electoral que permita a celebración de eleccións con plenas garantías, que os pasos acordados vaian en paralelo co levantamento de todas as sancións impostas a Venezuela e que se acelere o retorno dos 3.200 millóns de dólares, secuestrados en contas estranxeiras, destinados a investimento social en beneficio do pobo venezolano. Gustavo Petro foi rotundo cando ao finalizar o cume afirmou: "América non pode ser un espazo de sancións". A última foto do 25 de abril é un Juan Guaidó, o ex monicreque do Departamento de Estado, a CIA e o Comando Sur para disputarlle o poder de maneira ilexítima e violenta a Nicolás Maduro, chegando só ao aeroporto de Miami, tras entrar ilegalmente a Colombia supostamente para participar dun cumio ao que non fora convidado, o que lle valeu a expulsión de Colombia a Estados Unidos. Nove fotos que van da China a Suráfrica, de Estados Unidos a Rusia, pasando polo Brasil, Colombia ou Venezuela, que mostran a nova reconfiguración xeopolítica e o xurdimento dun novo mundo multipolar.