En setembro de 2015 os Estados membros da UE, reunidos no Consello Europeo, acordaron reasentar 160 mil persoas refuxiadas procedentes de Italia e Grecia. Un reparto desenvolvido através dun sistema de cotas e do que unicamente ficaban excluídos Grecia e Italia, para alén de Reino Unido, Irlanda e Dinamarca polas condicións en que asinaron a súa adhesión á UE e que lles permiten descolgarse das decisións adoptadas en materia de Interior e Xustiza.
Para os demais territorios o acordo, de obrigado cumprimento, fixaba unha cifra de 66 mil persoas refuxiadas nun primeiro período dun ano e 54 mil no segundo (cadro editado por El País). Porén, a Comisión vén de facer públicos os dados con data de 15 de marzo de 2016 e da cifra comprometida inicialmente (66 mil dun total de 160 mil en dous anos) só foron reasentadas 973 persoas.
Croacia, República Checa, Estonia, Hungría, Polonia ou Eslovenia e Eslovaquia non acolleron ningunha persoa refuxiada
Ningún dos 23 Estados membros suxeitos ao acordo cumpriu co seu compromiso, algúns deles como Croacia, República Checa, Estonia, Hungría, Polonia ou Eslovenia e Eslovaquia nen sequera deron acollemento a unha soa persoa. Outros, como acontece no caso do Estado español, a cifra de persoas reubicadas non só é residual (18 dun total de 8.023) senón que só proceden de Italia sendo que se comprometera a recibir refuxiadas maioritariamente ubicadas en Grecia.
O país que maior número de persoas acolleu foi Franza (283) un número que, no entanto, fica lonxe das 12.962 que acordou no mes de setembro.
Franza é o país con maior número de reasentamentos (283) mais lonxe da cifra que se comprometeu a asumir
Os dados achegados pola Comisión europea coinciden coa re-abertura das mesas de negociación entre a UE e Turquía a respeito dun acordo que pretende deportar masivamente as persoas refuxiadas até Ankara para que soliciten alí asilo. Nese contexto, os Estados membros da UE din que asumirían o reasentamento dunha persoa refuxiada siria con tal dereito recoñecido en Turquía por cada persoa que Ankara acepte procedente de Grecia.