Os talibán comezaron a entrar en Kabul, confirmou a primeiras horas deste domingo o ministerio do interior de Afganistán após anuncialo portavoces do grupo armado .
A entrada na capital afgá ten lugar poucas horas despois de que o grupo tomase o control da principal cidade oriental de Jalalabad, asegurando estradas e comunicacións fulcrais que conectaban o país con Paquistán.
Un líder talibán en Doha, que foi o lugar de negociacións de paz durante anos entre o Goberno afgán e o grupo, dixo que os combatentes o domingo recibiron a orde de absterse da violencia e ofrecer unha saída segura aos que desexen saír de Kabul.
O presidente de Afganistán, Ashraf Ghani, abandonou o país após a entrada dos talibán en Kabul
Os talibán publicaron un comunicado nas redes dicindo que instruíron ás súas forzas para non tomar a cidade pola forza. En lugar diso, din, "as negociacións en marcha para garantir que o proceso de transición se complete con seguridade, sen comprometer a vida, a propiedade e o honor de ninguén e sen comprometer a vida dos habitantes da cidade", segundo informa Al Jazeera. Organizacións de Dereitos Humanos contrapoñen estas declaracións á realidade dos territorios baixo control afgán, onde as violacións de dereitos e liberdades son constantes.
Os talibán tamén publicaron outra declaración intentando tranquilizar bancos, comerciantes e empresarios de que as súas propiedades, cartos e institucións non serán perturbadas polo grupo armado.
لحظه خروج #اشرف_غنی از افغانستان و حرکت به تاجیکستان pic.twitter.com/evBnbSKjjr
— خبرگزاری تسنیم 🇮🇷 (@Tasnimnews_Fa) August 15, 2021
Un país ao bordo da catástrofe humanitaria
As axencias da ONU alertaron este 13 de agosto do rápido empeoramento da situación no Afganistán. "Tememos que o peor está por chegar. A situación ten todas as características dunha catástrofe humanitaria", dixo Thomson Phiri, do Programa Mundial de Alimentos. Máis de 250.000 persoas víronse obrigadas a abandonar os seus fogares desde maio (80% mulleres e crianzas), sinalou Shabia Mantoo, da axencia da ONU para os refuxiados.
Moitos informaron de extorsións por parte de grupos armados no camiño. A maioría foxe desde zonas rurais cara a Kabul. "Están a durmir ao aire libre, en parques e espazos públicos", afirmou Jens Laerke, portavoz da Oficina de Coordinación de Asuntos Humanitarios. "Unha das principais preocupacións neste intre é nada máis que atoparlles un refuxio", dixo. E a OMS tamén expresou a súa preocupación pola escaseza de materia médico. A ONU informou de que os seus 320 traballadores non abandonarán o Afganistán.