O Tribunal Supremo procesa por rebelión 13 líderes independentistas cataláns

Carles Puigdemont, Oriol Junqueras, Carme Forcadell, Marta Rovira e Jordi Turull entre as persoas procesadas. O delito de rebelión está penado até con 25 anos de prisión. O maxistrado Pablo Llarena decide procesar 25 das 28 persoas investigadas, entre membros do Govern, da mesa do Parlament ou portavoces de grupos parlamentares independentistas.

catalunya

O Tribunal Supremo procesa por rebelión a 13 líderes independentistas, entre eles Carles Puigdemont, Oriol Junqueras, Carme Forcadell e Jordi Turull. A decisión comunicouse ás partes esta mesma sexta feira pola mañá.

O resto de procesados son Joaquim Forn, Raül Romeva, Clara Ponsatí, Josep Rull, Toni Comín, Dolors Bassa, Jordi Cuixart, Jordi Sànchez. A Meritxell Borràs, Lluís Puig, Carles Mundó, Santi Vila e Meritxell Serret impútalles os delitos de malversación e desobediencia. As penas por rebelión poden chegar aos 25 anos de prisión.

O xuíz Pablo Llarenaimpón unha fianza de responsabilidade civil de 2,1 millóns de euros a catorce ex membros do Govern destituidos após a aplicación do 155 por parte do goberno español.  Ademais, os ex membros da Mesa do Parlament e as representantes da CUP son procesados por un delito de desobediencia: Lluís María Corominas, Lluís Guinó, Anna Simó, Ramona Barrufet, Joan Josep Nuet e Mireia Boya e Anna Gabriel.

Llarena procesa 25 das 28 persoas investigadas e deixa fóra do auto de procesamento o ex presidente da Generalitat Artur Mas, a coordenadora xeral do PDeCAT, Marta Pascal, e a ex presidenta da Asociación de Concellos pola Independencia Neus Lloveras.

Comentarios