Os sindicatos franceses xogan a última carta para frear a reforma das pensións

Arredor de seis meses despois do comezo das manifestacións impulsadas polas forzas sindicais de Francia en contra da reforma das pensións defendida polo presidente Emmanuel Macron, que eleva de 62 a 64 anos a idade de xubilación, esta terza feira hai convocadas 250 concentracións por todo o país na que constitúe a 14ª xornada de mobilización xeral, dous días antes do debate na Asemblea Nacional dun proxecto para anular a reforma. Esta pode ser a última xornada desta vaga de mobilizacións, que incluíron folgas e accións de protesta que desenvolveron múltiples sectores, após ir aumentando o espazo de tempo entre manifestacións unha vez que o Consello Constitucional avalou os aspectos chave da reforma, permitindo a Macron promulgala horas despois tras ter forzado a súa aprobación cun recurso constitucional para evitar a votación da reforma no lexislativo. A dobre negativa do Constitucional a permitir un referendo para que a poboación tivese a última palabra tamén fechou a vía principal dos sindicatos para impedir en última instancia a aplicación da reforma de Macron. Así e todo, as forzas sindicais recalcaron que “non imos pasar páxina” e fixeron un chamamento a participar nas folgas e mobilizacións “xuntos, unidos e decididos” para “obter o retiro da reforma e polo progreso social”. En paralelo, advertiron que “se máis unha vez o Goberno persiste en abrirse paso á forza, utilizando artimañas constitucionais, o enfado non fará máis que reforzarse”. Greves no ensino e no transporte Amais das manifestacións a previsión das greves levou a suspender un terzo dos voos no aeroporto de Orly, en París, e dunha quinta parte en Lyon, Niza, Tolosa, Bordeos e Nantes, con cancelacións asemade no transporte ferroviario. Tamén se agarda un importante impacto no ensino, onde ao anuncio de folga das organizacións sindicais se uniron até cinco entidades da mocidade. O Ministerio de Interior francés estimou que entre 400.000 e 600.000 persoas sairán hoxe á rúa a protestar no país, malia a participación de millóns de persoas en anteriores xornadas, e trasladou que despregou 11.000 axentes tras denuncias de represión violenta e até abusos sexuais por parte das forzas de seguridade, o que obrigou a Organización das Nacións Unidas a lembrar a París que ten que garantir o dereito á protesta pacífica. Ademais, unha cidadá do norte de Francia foi arrestada e enviada a xuízo por chamar “lixo” a Macron nas súas redes sociais. Ao respecto, Le Figaro reportou esta segunda feira que o caso de tres axentes integrantes da Brav-M, as Brigadas Motorizadas para a Represión das Accións Violentas, foi enviado ao consello disciplinario tras deter sete persoas novas no marco dunhas manifestacións en París en marzo. Unha delas, Adoum Souleyman, un estudante procedente do Chad, gravou as detencións e como os policías lle reiteraron que “a próxima vez que veñamos non vas subir ao coche para ir á comisaría, vas subir a outra cousa que se chama ambulancia para ir ao hospital”. Debate na Asemblea Nacional Segundo os medios locais, o proxecto da formación centrista LIOT -que xa encabezara unha moción de censura contra o Executivo da primeira ministra Élisabeth Borne- programado para ser abordado a quinta feira na Asemblea Nacional e que anularía a reforma das pensións case non conta con posibilidades de prosperar no órgano. Aliás, e a pesar de que durante o seu paso polas comisións parlamentarias o proxecto foi baleirado de contido, Yaël Braun-Pivet, a presidenta da Asemblea por parte de Renacemento, a formación de Macron, trata de impedir que chegue a ser debatido e votado pola Cámara, para o que podería apelar a un recurso constitucional consistente en declarar a proposta “financeiramente inadmisíbel”. “Se impide a votación iso vai facer moito dano á democracia”, alertou Manuel Bompard, coordinador da Francia Insubmisa, a principal formación da Nova Unión Popular Ecolóxica e Social, que incidiu en que estas medidas responden a que Macron “ten medo a perder”, explicando que Braun-Pivet foi premida polo mandatario para evitar a tramitación do texto após asegurar nun primeiro momento que non o faría, polo que “cantos máis esteamos na rúa máis comprenderá que non pode volver abrirse paso coa forza”. Nese sentido, tanto a forza progresista como LIOT deixaron entrever que valoran nesas circunstancias a presentación dunha nova moción de censura contra Borne. A crise de Macron Do mesmo modo que actuou ao longo das protestas da poboación contra a reforma, negándose a negociar calquera mudanza ao documento, que economistas cualificaron de innecesaria a nivel financeiro e precisa só para que Macron cadre o orzamento coas vantaxes fiscais que outorgou ás empresas, o mandatario promulgou a fin de semana os primeiros decretos de implementación da reforma das pensións, que entrarían en vigor o 1 de setembro, nos que fica recollido o aumento de dous anos na idade de xubilación para as traballadoras e traballadores que desenvolvan actividades de risco, publica Le Monde. Despois de imporse nos comicios presidenciais e lexislativos -mais sen maioría absoluta- de 2022, a polémica pola reforma das pensións minou o apoio social de Macron, que fica en 29% da poboación segundo a última enquisa do instituto Elabe, con 66% das e dos franceses en contra da reforma das pensións e unha porcentaxe semellante favorábel ao proxecto de LIOT. Dúas de cada tres persoas no Estado defenden a continuidade das mobilizacións e un terzo aposta por endurecer as protestas, até o punto de que a maioría da poboación non cre na veracidade de anuncios como o da baixada dos impostos feito por Macron para combater o descontento popular. Neste contexto, 64% subscribe que o presidente non conta neste momento nin cun proxecto nin cunha visión de conxunto para o Estado francés. Unha nova xeración nas protestas No seguimento das mobilizacións efectuado pola prensa local destacaron repetidos testemuños de persoas que se manifestaban por primeira vez, participando das iniciativas sindicais para intentar frear a reforma. Estas manifestacións, amais de dificultar a implementación dos proxectos do último mandato de Macron, que non se podería presentar na seguinte lexislatura á Presidencia, levaron a que sete de cada dez persoas opinen que a reelección de Macron foi mala para Francia.