O director do Centro de Coordinación de Alertas e Emerxencias Sanitarias, Fernando Simón, estimou esta cuarta feira, 3 de xuño, que no Estado español rexistraranse ao redor de 28.000 falecementos pola COVID-19.
Actualmente, segundo o último informe publicado polo Ministerio de Sanidade, 27.128 persoas morreron como consecuencia do virus, aínda que tanto o Instituto Nacional de Estatística (INE) como o Sistema de Monitoraxe da Mortalidade diaria (MoMo) estimaron que, a nivel xeral, no Estado se produciron entre 43.000 e 44.000 mortes máis das previstas para este período.
Neste sentido, Simón sinalou que as 28.000 defuncións que el estima supoñen 66% do total de exceso de mortes detectadas tanto polo INE como polo MoMo respecto do ano pasado. Simón tamén considerou que 30% do exceso de mortalidade calculado por eses institutos pode estar asociado a outros factores como, por exemplo, a gripe deste ano ou a que, debido á sobrecarga de traballo que houbo durante a pandemia nos hospitais, algunhas persoas retrasasen o seu acceso aos servizos hospitalarios e falecesen como consecuencia.
"Todo isto poderémolo valorar ben dentro duns meses cando os certificados médicos de defunción coa causa principal de falecemento nos permitan facer estatísticas moito máis detalladas", salientou Simón, para asegurar que se van coñecer "todos os falecementos pola COVID-19 en España".
Segundo o INE, o número estimado de defuncións en España durante as 21 primeiras semanas de 2020, até o 24 de maio, ascende a 225.930 persoas, o que supón un aumento de 24,1% (43.945 máis) respecto ao mesmo período do ano anterior. De acordo con este informe, a semana con maior número de defuncións foi do 30 de marzo ao 5 de abril. Por idades, os maiores aumentos déronse entre maiores de 90 anos, seguido do grupo de idade de 85 a 89 anos.
