Centos de simpatizantes do ex presidente Jair Bolsonaro -que se atopa vivindo nos EUA- superaron as barreiras policiais e invadiron a sede do Congreso brasileiro en Brasília no marco dunha manifestación contra o novo presidente brasileiro, Luiz Inácio Lula da Silva.
Segundo informan as axencias, algúns dos asistentes diríxense ao palacio presidencial, o Palacio de Planalto, e á sede do Tribunal Supremo Federal co obxectivo declarado de derrocar a Lula e o seu vicepresidente, Geraldo Alckmin.
Os manifestantes concentráronse este domingo diante do Cuartel Xeral do Exército, no centro administrativo de Brasília, e marcharon até a zona dos Ministerios, onde se produciron os incidentes.
A área ao redor do Congreso fora acordoada polas autoridades, mais os bolsonaristas, que se negan a aceptar a elección de Lula como presidente, lograron romper os cordóns de seguridade.
Como consecuencia desta acción, varias decenas de manifestantes lograron subir a rampla deste edificio e ocupar o seu tellado.
Lula, que asumiu a Presidencia de Brasil o pasado día 1, atópase esta fin de semana de viaxe na cidade de Araraquara, en São Paulo.
