Pedro Sánchez e Pablo Iglesias asinaron esta terza feira no Congreso español o acordo de Goberno de PSOE e Unidas Podemos para formar un Executivo de coalición para toda a lexislatura e, en palabras de Sánchez, «rotundamente progresista». Un Goberno no que o líder do PSOE será presidente e o de Unidas Podemos vicepresidente.
«É unha honra traballar para os nosos compatriotas. Pedro Sánchez pode contar coa nosa lealdade. Imos traballar para conseguir a maioría parlamentar precisa para a investidura e a lexislatura», dixo Iglesias na sinatura do pacto.
Sánchez manifestou que o Goberno vai ser «rotundamente progresista, integrado por forzas progresistas e que vai traballar polo progreso de España».
Dez puntos prioritarios
O preacordo estabelece 10 puntos de actuación para o novo Executivo de coalición: A loita contra a mudanza climática e transición enerxética, as políticas de igualdade e contra a violencia machista, ampliación de dereitos sociais e o combate do paro e da precariedade laboral a través dunha reforma laboral que recupere dereitos recortados, son algunhas desas liñas de actuación.
A respecto de Catalunya, o preacordo é ambiguo e fala de diálogo e de garantir a convivencia.
BNG: «Axenda Galega»
En relación ao preacordo, a portavoz nacional do BNG, Ana Pontón, afirmou que o apoio do nacionalismo galego estará condicionado á existencia «dun compromiso claro cunha axenda galega que non pode seguir agardando durante máis tempo». A líder nacionalista lamentou que o documento de preacordo sexa «moi vago e con moitas xeneralidades que non permiten coñecer en profundidade cal vai ser a acción concreta desa proposta para un goberno de desbloqueo».
Así mesmo, para Pontón confírmase que «se en abril non foi posíbel un acordo debeuse á irresponsabilidade desas forzas políticas -en referencia a PSOE e Unidas Podemos- que levaron ao conxunto da cidadanía a unhas novas eleccións», e engadiu que «é unha mágoa que o que agora se soluciona en 24 horas» tardase tantos meses e conlevase unha novas eleccións «que serviron para pór unha alfombra vermella á extrema dereita».
Así, o voto do deputado do BNG nas Cortes Xerais, Néstor Rego, estará vinculado a que se acepten unha serie de compromisos do futuro Goberno central coa Galiza e que desde o Bloque detallarán nos próximos días.
[ABRO FÍO] PSOE e Podemos demostran que en Abril non houbo acordo porque non quixeron. A súa irresponsabilidade púxolle unha alfombra vermella á extremadereita. O acordo asinado é unha declaración de intencións con moitas interrogantes sobre o contido real desde programa.
— Ana Pontón (@anaponton) November 12, 2019
Feixoo apela Sánchez a falar cos defensores da unidade de España
«Pense moi ben o acordo con Podemos», pediu Alberto Núñez Feixoo a Pedro Sánchez. O presidente da Xunta de Galiza exhortou o líder do PSOE a «voltar a falar» cos partidos «non dubidosos de defender a unidade de España e o Estado autonómico».
Sobre o preacordo conseguido a 24 horas das eleccións xerais, o presidente galego afirmou que ninguén vai confiar en Pedro Sánchez «de ser verdade que nos enganaron a todos durante tanto tempo», en referencia á imposibilidade de chegar a un acordo de goberno na anterior lexislatura.
Menuda tomadura de pelo dejar para hoy lo que se pudo haber hecho hace seis meses. Nos podemos imaginar cómo terminará pero empieza mal. Y lo peor es que todo esto se produce con una situación territorial crítica y muy compleja en lo económico
— Alberto Núñez Feijóo (@FeijooGalicia) November 12, 2019
Caballero celebra o preacordo e anuncia que haberá cambio na Galiza
O acordo alcanzado entre Unidas Podemos e PSOE esta terza 12 de novembro é para Gonzalo Caballero unha boa nova que anuncia «o cambio de goberno» que se dará na Galiza nas eleccións ao Parlamento Galego de 2020.
Desta maneira celebrou o secretario xeral do PSdeG o preacordo e para a formación dun goberno de coalición no Estado e afirmou que marca «o principio dunha lexislatura de prosperidade e de futuro para España e a Galiza».
Nese sentido, Caballero sinalou que se atopan «plenamente satisfeitos de que se avance nesta liña de acordo porque o PSdeG sempre apoiou que houbese un goberno progresista, socialista e de esquerdas para o conxunto do Estado».
En declaracións aos medios nos corredores do Parlamento Galego, Caballero quixo restar importancia ao feito de que acordo se producise após unha repetición electoral motivada pola falta de entendemento entre estas mesmas forzas, e emprazou a mirar «cara a adiante».
🔴 Paréceme moi ben que avancemos cara un goberno progresista en España. Hai moitos retos aos que atender, e había que desbloquear a situación. Adiante.https://t.co/m4sBzc1rLQ
— Gonzalo Caballero (@G_Caballero_M) November 12, 2019
Común da Esquerda valora o acordo como o camiño para botar Feixoo
Para o grupo parlamentario Común da Esquerda, formado por Anova, Podemos e EU, o principio de acordo para un Goberno central alcanzado por PSOE e Unidas Podemos marca o camiño a seguir para botar Feixoo da Xunta.
A viceportavoz de Común da Esquerda Luca Chao expresou a súa satisfacción polo preacordo de goberno no Estado asinado esta terza 12 de novembro por PSOE e Unidas Podemos, un pacto que, para a tamén membra de Podemos, «marca claramente cal é o camiño para desaloxar a Feixoo da Xunta» nas eleccións galegas previstas para 2020.
O goberno de coalición non resolverá todo, pero é necesario para implementar políticas de blindaxe dos dereitos sociais que freen o discurso da extrema dereita e garantan que a recesión non volva pesar sobre as de abaixo. Cautela, mais hoxe, parabénshttps://t.co/VTffbP0Yxu
— Luca Chao (@LucaChao_) November 12, 2019
Villares reclama que o acordo responda ás emerxencias da Galiza
O Goberno central que formen Unidas Podemos e PSOE debe, en opinión de Luís Villares, priorizar a derrogación da lei mordaza e da reforma laboral, así como asumir compromisos orzamentarios coa Galiza
O portavoz de En Marea e o grupo mixto no Parlamento da Galiza, Luís Villares, preguntouse se «facía falta unha repetición electoral e o ascenso da extrema dereita para que lles viñese o sentido» e alcanzasen un acordo de Goberno no Estado.
Villares reclamou como necesaria a «existencia dunha auténtica axenda galega para que os orzamentos de 2020 non cometan o mesmo agravio que os de 2019».
É positivo un acordo para un goberno de progreso, pero agora ten que demostralo coas medidas e os orzamentos que a cidadanía precisa Derrogación da reforma laboral, acabar coa lei mordaza e atender as necesidades de Galicia. Son maneiras de demostrar o progreso @VillaresLuis pic.twitter.com/yc5NLbF9Nb
— En Marea (@En_Marea) November 12, 2019
Esquerra sitúase no ‘non’ a Sánchez e emprázano a dialogar
A portavoz e secretaria xeral adxunta de ERC, Marta Vilalta, afirmou que a súa formación parte do 'non' á investidura de Pedro Sánchez, mais engadiu que, se o candidato de PSOE quere que Esquerra reconsidere a súa postura, ten que volver apostar polo diálogo e recoñecer que o problema en Catalunya non é interno e de convivencia, senón político e co resto de España.
«Ten que sentar e falar. Entender que aquí hai un conflito político que require dunha solución democrática e política. Se queren algo de nós téñense que sentar e falar, e, se non, non hai nada que facer», expresou Vilalta nos corredores do Parlament, esta terza feira 12 de novembro en relación ao preacordo para a conformación dun Goberno no Estado alcanzado en PSOE e Unidas Podemos.
ERC abstívose no último debate de investidura de Sánchez, mais consideran agora que a situación cambiou e lembran que en xullo xa advertiron que no «escenario postsentencia do 1-O sería moito máis difícil».
Junts mantense no «non»
A cabeza de lista de JxCat no Congreso, Laura Borràs, mantivo esta terza 12 de novembro o 'non' do seu espazo político á investidura do presidente do Goberno en funcións, Pedro Sánchez, e acusou a Podemos de comprar «o marco mental do 155» após o preacordo que alcanzaron.
O líder de Junts per Catalunya, Carles Puigdemont, empregou o sarcasmo para valorar o acordo alcanzado por PSOE e Unidas Podemos e cualificou Iglesias e Sanchez de «xenios» por repetir unhas eleccións que reforzaron a ultradereita para chegar a un acordo en 24 horas que hai días semellaba imposíbel.
A través da súa conta de Twitter, o ex president Carles Puigdemont e líder d JxCat, que conta con 8 actas no Congreso, valorou desde o exilio o preacordo alcanzado por Unidas Podemos e PSOE, e fíxoo tirando de ironía. «Son uns xenios», asegurou en referencia a Pedro Sánchez e Pablo Iglesias por conseguiren en 24 horas o que semellaba imposíbel na anterior lexislatura.
Allò que no era possible quan el PSOE i UP tenien més diputats ho és ara que en tenen menys. Allò que impedia a Sánchez de dormir bé, ara li conciliarà el son. Han repetit eleccions, s'han debilitat, han engreixat la dreta i la ultradreta... per arribar allà mateix. Uns genis.
— Carles Puigdemont (@KRLS) November 12, 2019
Para a CUP é un «erro» que se apoie o pacto
A formación independentista advirte que co apoio a PSOE e Unidas Podemos repetirase o esquema da transición, xa que se pedirá desmobilización ao independentismo axitando a «pantasma de Vox».
Desde o pasado domingo 10 de novembro a CUP ten dúas actas no Congreso dos Deputados e após coñecerse o principio de acordo entre Pedro Sánchez e Pablo Iglesias para a conformación dun Goberno central de coalición, o deputado independentista electo Albert Botran chamou a non caer no «erroۛ» do pacto entre as dúas forzas estatais.
Tothom sap que la solució és autodeterminació, amnistia i drets socials. I que només la guanyarem amb mobilització com la d'aquests dies.
— Albert Botran Pahissa (@albertbotran) November 12, 2019
Si es consuma l'acord PSOE-Podem ens demanarà desmobilització amb l'espantall de VOX. L'esquema de la Transició. Un error caure-hi.
Para Botran o acordo non vai servir para conseguir a autodeterminación, a amnistía das e dos presos soberanistas nin os dereitos sociais, e considera que estas cuestións só se logran grazas á mobilización.
O PNV non compromete o seu apoio mais amosa satisfacción
Desde o Partido Nacionalista Vasco saudaron o principio de acordo alcanzado. O portavoz jeltzale no Congreso, Aitor Esteban, lembrou que en reiteradas ocasións solicitaron desde o nacionalismo vasco que se chegase a un acordo entre ambas as dúas forzas estatais, e remarcou a «falta de responsabilidade» que tiveron UP e PSOE que abocou a novas eleccións.
Esteban non comprometeu aínda o voto do seu partido e pediu máis tempo para coñecer o contido e os compromisos de PSOE e Unidas Podemos antes de decantarse con máis claridade.
Valoración de @AITOR_ESTEBAN del preacuerdo PSOE-Podemos:
— EAJ-PNV Congreso (@EAJPNV_Congreso) November 12, 2019
"Este acuerdo lo venimos pidiendo desde hace mucho tiempo porque era necesario, antes y también ahora, para conformar una mayoría. Lo que lamentamos es que hayan tenido que pasar meses y meses" pic.twitter.com/Ge2SGmSyho