"O PSOE nunca permitirá un referendo de autodeterminación". Así de claro advertiu o presidente do Goberno español, Pedro Sánchez, na súa comparecencia no Congreso dos Deputados para explicar os indultos aos presos políticos cataláns. "Teñen que exercer o principio do realismo", acrecentou Sánchez en referencia ás aspiracións dos independentistas.
Sobre os indultos, Sánchez dixo que son parciais, non eliminan as inhabilitacións e non cuestiona o fallo do Tribunal Supremo español. Neste sentido, subliñou que son necesarios para abrir un camiño de diálogo coa Generalitat. "É a primeira resposta á grave crise en Cataluña", dixo
Néstor Rego, deputado do BNG no Congreso: "Pedimos ao Goberno de España que recoñeza o dereito de autodeterminación para os pobos"
A resposta deulla durante a propia sesión o portavoz de ERC, Gabriel Rufián: “Di que nunca haberá un referendo de autodeterminación, mais tamén dixo que nunca habería indultos, así que denos tempo”. O de Esquerra, porén, centrou as súas críticas ás bancadas das dereitas (PP, Cs e Vox): Este Goberno indultou, si, a nove políticos e políticas inxusta e salvaxemente encarcerados durante tres anos. E aquí non pasou nada, a xente non está a queimar nada na rúa”.
Néstor Rego, deputado do BNG no Congreso español sinalou na súa intervención, en relación aos indultos, que “non vai ser o BNG quen o critique por iso, mais é unha medida claramente insuficiente”.
“O que corresponde é a amnistía para as persoas condenadas ou exiliadas de Cataluña, porque exercer dereitos democráticos, como o de voto, nunca pode ser delito. É máis, pedimos ao Goberno de España que recoñeza o dereito de autodeterminación para os pobos que del formamos parte", manifestou.
Tamén se pronunciou sobre os indultos o portavoz do PNV na Cámara española, Aitor Esteban, Aitor Esteban, que preguntou ao PP: Cal é a súa receita? Que volvan ao cárcere?".
Para Íñigo Errejón, pola súa parte, “os indultos son a garantía de que o conflito político volve á política, de onde non tiña que saír". Jaume Asens, portavoz adxunto de Unidas Podemos, manifestou que “os indultos son un punto de fortaleza", e agradeceu os presos políticos cataláns que non se deixasen "vencer polo odio e a rabia que se respira hoxe na bancada da dereita".